Alberro: "Proposamenak herriarekin izan dugun harremanaren ondorio dira"
Datorren legegintzaldiko programaren ildo nagusiak aurkeztu ditu EH Bilduk. Epe luzekoez gain, lehen seihilekorako konpromisoak ere badituzte.
Goian, ezker-eskuin: Iraitz Pazos, Mikel Garcia eta Amaia Muguruza. Behean, Natitxu Etxarri, Aintzane Taberna, Teo Alberro, Aitor Brion eta Laura Re. 
Atzo arratsaldean Pasaiako EH Bilduren alkategai Teo Alberrok, alderdiaren hautagaitza osatzen duten lehen bederatzi zerrendakideez lagunduta (Migel Mari Torrea, bosgarrena, ezin izan zen bertaratu), datorren legegintzaldian ardatz izango duten programaren ildo nagusiak aurkeztu zituen Donibanen. Plan “anbiziosoa bezain arduratsua” osatu dutela ziurtatu zuen zerrendaburuak.
Lan-ildoak pasaitarrekin elkarlanean diseinatu dituzte bilkideek: “Proposamen hauek herritarrekin eta herriko eragileekin izan dugun harreman etengabearen ondorio dira, agintaldian zehar mantendu dugun harremanarena zein azken asteotan eragile mordoarekin egin ditugun bileretatik irtendakoak”. Pasaiako indar nagusiak udalbatzan egindako lanetik eratorritako ezagutza ere oinarri izan dute.
Programaren berritasun nagusia ekintzak gauzatzeko epeekin lotuta dago: epe ertainari zein luzeari begirako proposamenez gain, legegintzaldiko lehen seihilekoan bete nahi dituzten hainbat konpromiso jaso ditu koalizio subiranistak. Horien artean Alberrok aipatu zituen, besteak beste, “etenda dagoen” herritarrekiko harremana eta alkateordetzak “lehenbailehen” berreskuratzea, edota aparkalekuarekin lotutako ordenantza herritarrekin lantzea.
Azken egunotako kanpainetan herriko alderdi baten eta bestearen ahotan errepikatu diren erronka eta proiektuak badaude, baina bilkideek ziurtatu dute badela euren koalizioa besteengandik ezberdintzen duen ezaugarri nagusi bat: “Guzti horiek herritarrekin eta eragileekin batera gauzatu nahi ditugula, etengabeko harremanean eta elkarlanean. Badugulako gauza bat argi: gure proiektuak onak edo egokiak izan daitezke, baina herritarrekin batera lantzen den edozein proiektu hobea izango da ziur, eta hori horrela izan dadin egingo dugu lan etengabe”.
Promosamenak
Gobernantza eredu berria sustatu nahi du EH Bilduk, “gertukoa eta herritarren beharrei erantzungo diena”. Hori dela eta, zaintzaren erronkari ekingo diotela ziurtatu dute, eta baita jarduera ekonomiko berriak bultzatu ere. “Betiere, herritarren beharrak zentroan jarrita eta jasangarritasuna oinarri”. Ondoko zerrendan, atzo aipaturiko ardatz nagusiak:
- Donibanen. Saneamenduaren obra herritarrekin batera landu nahi dute, bizilagunen parte hartzerako foro bat eratuz. Era berean, Meipiko eta hirigune historikoaren irisgarritasuna hobetzeko lan egingo dutela berretsi dute.
- San Pedron. Alberrok esandakoak: “Goiko aldearen utzikeriari aurre egingo diogu arreta berezia jarriz irisgarritasun elementuetan eta urbanizatu gabeko kaleetan, Kanpitxu kasu. Eta behealdean, Arraunlari progresiboki oinezkoentzat izan dadin lan egingo dugu”.
- Antxon. EH Bilduk Madrilen lortutako akordioari esker Luzuriagako ekipamendu kultural eta sozial berria garatu nahi dute, “herritarrekin eta bertako eragileekin”. Topoaren obraren jarraipena egiteko foro berezia ere sortu nahi dute, ETSren eta herritarren parte hartzea izango duena.
- Trintxerpen. Andonaegiko birgaitzea integrala izan dadin inbertsioak egingo dituela ziurtatu du EH Bilduk, kaleak urbanizatuz eta ur depositu zaharrean aparkaleku eraikina eginda. “Horrez gain, lehen unetik Ziritza herritarrena izan dadin lan egingo dugu, bertarako proiektua idatzita”.
- Kultur, kirol eta herri eragileekin lana egingo dute.
- Herriaren eta portuaren arteko harreman “tentsionatuari” heltzeko proposamenak egin.
