Ekainaren 19tik aurrera, Lezoko aparkaldi mugatua kontrolpekoa izango da
Ordura arteko epea sistemara egokitzekoa izango da. Ekainaren 19tik aurrera aparkaldi mugatuko hiru eremuetan egoiliarrek bakarrik utz ditzakete ibilgailuak.
![](https://oarsoaldea.hitza.eus/site/files/2023/05/lezo-aparkaldia.jpg)
Lezoko Udalak iragarri du ekainaren 19tik aurrera ezarri berri diren aparkaldi mugatuko eremuak kontrolatuko dituela. Hau da, data hori arteko egunak egokitzekoak izango dira, eta hortik aurrera hiru eremuetan 20:00etatik 08:00etara nork aparkatzen duen aintzat hartuko dute, eta baimenik izan ezean, isuna jaso dezakete hori ez dutenek.
20:00etatik 08:00etarako denbora tarte horretan egoiliar txartela bakarrik dutenek aparka dezakete zonalde horietan. Eremuak, honakoak direla oroitarazi du udalak: Tomas Garbizu kalea; Polentzarrene, Guillermo Lazon eta Hipolito Gezala kaleak; eta Zubitxo kaleak eta Elisa Salaberriak osatzen duten eremua.
Egoiliar txartel hori 10 euroan eskura daiteke udaleko erregistroan (astegunetan 08:30-13:30), edo Internet bidez. Hainbat baldintza bete behar dira eranskailu moduko agiria eskuratzeko: eskatzailea eta ibilgailua Lezon erroldatuta egotea; udalarekin zorrik ez izatea; eta kotxeko asegurua indarrean izatea.