Badia biziberritzeko proposamenak egin ditu Elkarrekin Podemosek
Badian ekonomia urdinari lotutako jarduera ekonomikoak proposatu ditu Miren Etxebeste ahaldungaiak. Porturako sarbide pribatuak kritikatu ditu.
Alex Garagarza alkategaia eta Miren Etxebeste ahaldun nagusi izateko hautagaia, atzo, Lezon. Kanpainako bisita egin zuen atzo Lezora Miren Etxebeste Elkarrekin Podemos koalizioaren ahaldun nagusi izateko hautagaiak. Harekin batera Alex Garagarza Lezoko Elkarrekin Podemosen zerrendaburua izan zen. Etxebestek azaldu zuenez, badiaren inguruko herriek itsasoarekiko duten nortasuna berreskuratu behar dute, “eta merkatu-nitxo berriak bultzatu behar dira badia biziberritzeko”.
Aldi berean, porturako sarbideak herritarrentzat itxita izatea kritikatu zuen ahaldungaiak, “kostaldeko sarbideen pribatizazioa eta horrek sortzen duen itsasoarekiko lotura emozionalik eza” salatu zituen: “Enpresak bakarrik sar daitezke beren negozioak egiteko”. Etxebesteren ustez, horrek Pasaiako, Lezoko eta Errenteriako biztanleei eragiten die, kostaldeko herriak izanik, itsasoarekin loturarik ez dutelako, “herrien historiarekin loturarik ez izate horrek, herriek itsasoarekin duten nortasuna galaraztea dakar”.
Aldi berean, badiaren ingurua “eremu deprimitu” gisara izendatzea deitoratu zuen Etxebestek, eta esan zuen horrek zerikusia duela ekimen faltarekin, “ez ekonomikoa bakarrik, baita nitxo-ekonomiko berriak sortzeko motibazioari dagokionez ere”. Horri aurre egiteko, badiaren inguruan ekonomia urdinari buruzko ikerketa bultzatu behar dela nabarmendu zuen alderdi moreko buruak, “hau, da, itsasoarekin zerikusia duten alderdi guztien ikerketan oinarritutako ekonomia sustatzea. Horrela itsasoarekin galdutako nortasuna berreskuratuko dugu, eta merkatu-nitxo berriak bultzatuko ditugu”.
