Juneren Hegoak eta Gurutze Gorriak piztuko dute madalenetako suziria
Uztailaren 21ean txupina nork piztuko duen erabaki dute. Juneren Hegoak elkartea eta Gurutze Gorriaren Errenteriako Herri Batzarra izango dira madalenetako omenduak, plenoak, aho batez horrela onartuta.
Uztailaren 21ean txupina nork piztuko duen erabaki dute. Juneren Hegoak elkartea eta Gurutze Gorriaren Errenteriako Herri Batzarra izango dira madalenetako omenduak, plenoak, aho batez horrela onartuta. Atzo arratsaldean izan zen plenoa, eta aurkeztutako hautagaitzen artean, Errenteria-Oreretako bi elkarte horiek aukeratu zituzten txupinazoa piztu, eta madalenetako omenduak izan daitezen.
Juneren Hegoak elkarteak, gainera, hamargarren urteurrena du aurten.
Hainbat hautagaitza aurkeztu zituzten omendu izateko madalenetan. Gurutzea Gorriaren Herri Batzarra, Ereintza Aguaplast Senior taldea, Touring Kirol elkartea, Hibaikaren emakumeen trainerua, Line pertsonaia, Juneren Hegoak elkartea, eta auzoetako emakume taldeak: Alai, Gure Leku, Erlontzi, Laguntasuna, Loretoki, eta Patxiku Zelaia. Hautagaitzak aztertuta, eta kontuan hartuta araudiaren barruan urteko bi elkarte aitortzea baino ez dela aurreikusten bozeramaile batzordeak aho batez adostu du Juneren hegoak eta Gurutze Gorriaren Errenteriako Herri Batzarra omentzea, “nahikoa merezimendu dutelako, aurkeztutako gainontzeko hautagaitzak gutxietsi gabe”.
Aurkeztutako hautagaitza guztiak omendu izateko merezimendua dutela esan zuen Elkarrekin Errenteriako bozeramaile Maite Gartziak atzoko plenoan, “eskerrak eman nahi dizkiegu, beraz, guztiei, hautatuak izan edo ez, herriari egiten dioten ekarpenarengatik”. Juneren Hegoak elkarteak betetzen duen funtzio sozialaz aritu zen ondoren, eta nabarmendu boluntarioz osatuta dagoela. Gurutze Gorriaren herri batzarrak zaurgarrienen alde egiten duen lana aitortu zuen Gartziak. Biak zoriondu zituen hautatuak izan direlako: “Argi dut aurtengo madalenak inklusiboagoak eta solidarioagoak izango direla beraiei esker”.
PSE-EEren bozeramaile Isaac Palenciak ere aitortu zien hautagaitza guztiei omenduak izateko merezimendua: “Omenduak izango direnei zorionak eman nahi dizkiet eta egiten duten lana eskertu urtean zehar”.
EH Bilduren izenean Itziar Ostolaza mintzatu zen. Madalenak ez dira “jai soilak” koalizio subiranistako zinegotziarentzat, “hori baino askoz ere gehiago dira, izan ere, herrian eta herritik kanpo bizi diren , garen, herritarren topagune dira, herriarekiko maitasuna eta herri identitatea modu kolektiboan bizitzeko une badira, eta badira, aldarrikapen anitzetarako gune”. Aldarrikapena aipatuta herri aitortzari ere egin zion aipu Ostolazak, “udalaz harago, herri oso bat izango baita bi elkarte horiei babesa eta esker ona eskainiko dizkiena”.
Aurkeztutako hautagaitza kopurua nabarmen jarri zuen Ostolazak, “parte hartze hori ere badelako Orereta-Errenteria herri bizia denaren isla edo seinale, eta zalantzarik gabe, hautagaitza gutziak direlako merezimendu osoz aitortza jasotzeko aukera ezin hobe”. Nabarmen jarri zuen ere bi hautagaitzak aho batez aukeratu dituela udalbatzak, “horretarako erakutsi dugun prestutasuna aipatzekoa iruditzen zait”.
Omenduak izango diren elkarteez mintzo zen eta biek balioak partekatzen dituztela esan zuen, “batetik behar duten pertsonei laguntzeko sortu ziren eta hori dute xede, bidelagun izatea; lan boluntario eta altruista dute sostengu, pertsonak pertsonak laguntzen elkarren ezagutzak eta elkarren arteko zubiak eraikitzeak eskaintzen duen bizipena ordainsarien gainetik jarriz; herriarekiko harreman estuan jarduten dute biek, finean herri honen DNArekin bat egiten dute bi eragileek bete-betean, inor atzean utziko ez duen herria irudikatzetik, praktikara eramanaz, eguneroko jardun txikiak handi bihurtuz”.
EH Bilduren izenean eskerrak eman zizkien “bihotzez” eragile horietan lanean ari diren pertsonei , eta zoriondu jasoko duten “aitortza kolektiboarengatik”. Desio bat ere partekatu zuen Ostolazak, “izan daitezela aurtengo madalenak zuen omenaldiaren aitzakiapean, elkartasun olatu”.
Bat egin zuen ordezkari guztien hitzekin Aizpea Otaegi alkateak, azkenik, eta aurkeztutako hautagaitza kopurua herriak duen “bizigarritasunaren” eta dagoen “ekimenerako gaitasunaren” ondorio dela baietsi zuen. Hautagaitza guztiek merezi dutela omendu izatea erantsi zuen alkateak, “aurten ez dute aukera izango baina gure esker ona merezi duten zalantzarik ez da, herriari egiten dioten ekarpenarengatik. Egiten duten lanaren hedapenarengatik ere eskerrak eman nahi dizkiet, beren lanaren bidez beti esaten dugun hori lortzen lagunduko digutelako . Esaten dugu nahi dugula herri bat zeinetan bizi diren herritarrek inguruan gertatzen denarekin konprometituko diren, eta elkarte hauen lanaren zabalkundearen bidez ziur naiz herri eredu horretan sakontzeko aukera izango dugula”.
