EH Bildu: "Duela 12 urte hasitako bidean aurrera egiten jarraitzeko konfiantza eman diguzue"
Herritarrek babes handia erakutsi diote EH Bilduri atzoko hauteskundeetan. Babes horrengatik, esker ona azaldu die herritarrei koalizio subiranistak, eta bide egiten jarraituko duela hitzeman.
Atzo bilgunean egindako argazki bat. Argazkia: EH Bildu Emaitza oso onak lortu zituen EH Bilduk atzoko hauteskundeetan. Alkatetzara heldu zirenetik, hamabi urtez egindako lanarekin herritarren konfiantza irabazi dutela adierazten dute datuek, koalizio subiranistaren proiektu politikoak blaitu duela gizarte ehuna, eta atzera bueltarik ez duela hamabi urtez, egunero sendotzen joan den bideak.
Pozik, asebete azaldu ziren atzo bertan EH Bilduko kideak, hala adierazi zuen Aizpea Otaegi Mitxelenak, bigarrenez Errenteria-Oreretako alkate izango denak. Koalizio subiranistak mezua helarazi die gaur herritarrei, esker on mezua da: “Berriz ere egin dugu. Duela hamabi urte abiatutako bidean aurrera egiten jarraitzeko konfiantza eman diguzue herritarrek, botoen %41,07rekin”.
Emaitza horren atzean ez dagoela zoria nabarmen jarri du, gainera, “urte luzez prestona konprometitu askok egindako lan bikainaren ondorioa baizik. Horregatik, eskerrik asko herritarrei, bide kolektibo hau babesteagatik. Eta eskerrik asko, atzo eta azken urteetan itzalpeko lanean aritu zareten militante guztiei”.
