Teo Alberro: "Pozik gaude irabazi eta herritarrak udaletxean sartu ditugulako"
Lau barrutietan irabazi izanagatik asebete da Teo Alberro EH Bilduren alkategaia. Indar nagusia izan badira ere, kezkatuta du abstentzioak.
Teo Alberro Bilbao. 
Alde handiarekin irabazi ditu aurtengo hauteskundeak Pasaiako EH Bilduk, 1.000tik gorako aldea atereaz bigarren indar EAJri. Asebete da koalizio abertzalearen alkategai Teo Alberro lortutakoarekin, lau barrutietan izan baitira berdeak alderdirik babestuena.
“Pozik gaude irabazi dugulako eta, aldi berean, herritarrak ere udaletxean sartu direlako”, mintzatu da trintxerpetarra. Zortzi zinegotzi dituzte, eta launa EAJ eta PSE-EEk. Azken ordezkaritza Podemosek du, eta beraz, gobernatzeko giltza izango du alderdi horren zerrendaburu den Julen Rodriguezek.
Antxotar zerrendaburuak hausnarketa egin du lehenengo, bi zinegotzitik bat galdu baitute: “Ezkerraren zatiketak eragin digu”. Hori horrela ere, beste edozeren gaienetik gobernatu nahi dutela aitortu du Rodriguezek, eta beraz, elkarrizketarako prest daudela bai EH Bildurekin eta bai PSE-EE eta EAJk errepika dezaketen koalizioarekin ere. “Gurekin gobernatzeko prest dagoenarekin gobernatuko dugu”, mintzatu da eleduna.
Gobernantzarako giltza duenak nahiz pasaitarren gehien babestu duten zerrendaren buruak kezka adierazi dute gai berarekiko: abstentzioa. 2019an Oarso-Bidasoko kuota handiena erregistratu zen Pasaian, eta aurten are okerrera egin du datuak, %39tik %46ra igoaz. “Kontuan hartzeko moduko datua da”, mintzatu da Rodriguez, eta bide beretik Alberro: “Gure bozka kopuruak igo diren arren pena dugu; abstentzioak asko kezkatzen gaitu”.
Gobernatzeko moduko “ekipo itzela” dutela sinetsita dago Alberro, eta datozen asteak erabakigarriak izango direla badaki: “Beste alderdietako arduradunekin harremanetan jarriko gara”. Militantziari eta babesa adierazi dieten herritar guztiei eskerrak eman dizkie alkategai bozkatuenak. “Aldaketa eta Pasaiaren hobetzea bilatu duten herritar guztiei”.
