Gasteizko hilketa matxista salatu du Errenteriako Udalak aho batez
Mugimendu feministak bihar 19:00etan deitu du hilketa matxista salatzeko elkarretaratzera. Udal talde politiko guztiek bat egin dute deialdiarekin.
Lurdes del Hoyoren hilketa salatzeko elkarretaratzea hilaren 20an. Gasteizen herenegun izandako hilketa matxista salatu du adierazpen instituzional bidez Errenteriako Udalak. Aho batez onartu dute adierazpen hori udalean ordezkaritza duten talde politiko guztiek.
Erabat gaitzetsi du udalak Gasteizen gertatutako hilketa matxista eta “zero tolerantzia” adierazi du eraso matxista guztien aurrean. Lanean jarraitzeko konpromisoa berretsi dute indar politiko guztiek, gainera, “emakumeok indarkeria matxistarik bizi gaitezen”, eta edonolako erasoen aurrean jarrera aktiboa izatera deitu dituzte herritarrak.
Maialen Mazonen familiari gertutasuna adierazi diote, eta biharko —asteazkena 31— mugimendu feministak 19:00etan Niessen merkatalgunearen sarreran deitu duen elkarretaratzearekin bat egin dute alderdi guztiek, eta mobilizazioan parte hartzera deitu dituzte herritarrak.
Bi aste dira bikotekide ohiak Lourdes del Hoyo hil zuela Orion. Bera izan zen aurten Euskal Herrian indarkeria matxistak hil zuen lehenengo emakumea.
