Energiaz aritu dira ikasleak udaletxean
Agenda 30 programaren barruan, ikasleen bisita jaso zuten Aizpea Otaegi jarduneko alkateak eta Jose Manuel Ferradas jarduneko Ingurumen zinegotziak atzo
Agenda 30 foroa egin dute herriko ikasleek. Agenda 30 programaren barruan, ikasleen bisita jaso zuten Aizpea Otaegi jarduneko alkateak eta Jose Manuel Ferradas jarduneko Ingurumen zinegotziak atzo. Pleno aretoan egindako jardueran, ikasturte honetan energiaren inguruan egin duten lanketaren berri eman zieten ikasleek bi udal ordezkariei.
Oinarrizko ondorioa, honakoa: energia asko kontsumitzen dela, «askotan gehiegi, alferrik gastatzen delako». Horren harira, hainbat konpromiso hartu dituzte murrizte aldera kontsumo hori. Hala, berogailua piztu aurretik arropa gehiago janztea, argi naturala aprobetxatzea eta soilik behar direnean piztea argiak, arretaz erabiltzea gailu elektronikoak, edota gertu dauden lekuetara oinez edo garraio publikoan joatea.
Otaegik zein Ferradasek egindako lana aitortu zieten ikasleei, eta hitz eman, jasotako proposamenak kontuan izango dituztela. Udazkenean udal foroa egingo dute, eta ordurako erantzun landuagoa jasoko dute ikasleek.
