Gipuzkoako Bigarren Mailako kopa zuri-gorria da
Finalean hiruna berdindu eta gero, penaltietan 5-3 nagusitu zen Antxo AF 'B' Laskorainen aurka. Gipuzkoako kopa antxotarrena da.
Irabazleak, garaikurrekin. Lurraldeko kopa erdian, eta alboan Jonan Lasagabasterren saria, jokalariaren aurrean. 
Ezin borobilago itxi du denboraldia Antxo Areto Futboleko bigarren taldeak. Orain dela aste pare bat Gipuzkoako Bigarren Mailatik lehenengora igoera ospatu zuten, eta sasoiko azken partidarekin kopa bereganatu dute zuri-gorriek orain.
Laskorainen kontrako partida larunbat arratsaldean lehiatu zuten, Andoaingo Allurralde kiroldegian. Norgehiagoka bukaera aldera estutu zen, antxotarrak hasieratik nagusitu baitziren, baina etxekoek egoerari buelta ematea lortu zuten azken zatian, hiruna berdinduta heldu zirelarik taldeak partidaren bukaerara. Luzapenik ez zen izan, eta, gauzak horrela, penaltietan frogatu behar izan zuten lurraldeko garaikurra nork merezi zuen.
Bost gol aukeratan onena izango zen garaile. Final batean kanpoko zelai batean aritzeak berekin dakarren presioa bizkarrean izanda ere, bostak barrura jaurti zituzten Antxo AFko jokalariek. Horiek hasi ziren jaurtitzen, eta lehen hiruak golak izan ziren, bai alde batentzat nahiz bestearentzat. Laugarren aukeran huts egin zuen Laskoraineko jokalariak, eta bosgarrenean asmatzearekin garaile bihurtu ziren Antxokoak. Emaitza ikusita, azkena ez zuten bota etxekoek, eta 5-3ko markagailuarekin bukatutzat eman zuen partida epaileak.
Hori horrela, 2023ko Gipuzkoako Bigarren Mailako kopa poltsikoratu zuen klub zuri-gorriak. Hori aski ez, eta talde horretako Jonan Lasagabaster jokalaria beste garaikur batekin bueltatu zen etxera, lurraldeko golegile onenaren saria eman baitzioten antxotarrari ere.
