Trintxerpeko azokan autokontsumorako instalazioa egin dute
Eraikinaren teilatuan 25 moduluko instalazio fotovoltaikoa ezarri du udalak. Energia hori azokako autokontsumorako erabiliko da.
Azokako teilatua. 
Instalazio fotovoltaiko berria ezarri du Pasaiako Udalak Trintxerpeko azokaren teilatuan, energia iturri berriztagarrietan oinarritutako energia-trantsizioa bultzatzeko eta hobetzeko xedez.
400Wp potentziako 25 modulu jarri dituzte denera, eta panel guzti horiekin urtean 10.237 kWhko energia sortuko dutela aurreikusi dute teknikariek. Udalak energia hori azokako autokontsumorako erabil dadin lehenetsiko du, eta soberakina egongo balitz energia sare orokorrean txertatuko da hori.
Instalakuntza berria egiteko udalak egin duen inbertsioa 16.400 eurotik gorakoa izan da, eta Energiaren Euskal Erakundeak (EEE) 10.000 euroko diru laguntza eman diolarik tokiko erakundeari egindako inbertsioa arindu ahal izateko, Europar Batasunak finantzatutako NextGenerationEU laguntza lerroen barruan.
