Euskal presoen etxeratze prozesuaz arituko dira
Hitzaldia antolatu du Sarek hilaren 14rako. Egungo egoeraren azterketa egingo dute Onintza Ostolaza euskal presoen abokatuaketa Joseba Azkarraga Sareren bozeramaileak.
Euskal presoak etxeratzea eskatzeko banderola Errenteria-Oreretako balkoi batean. Euskal presoen etxeratze prozesuaren gaineko hitzaldia antolatu du Errenteria-Oreretako Sarek. Hilaren 14an, asteazkenarekin, izango da hitzaldia eta hizlariak, berriz, Onintza Ostolaza Arruabarrena euskal presoen abokatu oiartzuarra eta Joseba Azkarraga Rodero Sare Herritarraren bozeramailea izango dira. Naroa Iturri kazetariak gidatuko du hitzaldia. Reina aretoan izango da, 18:30ean hasita.
Euskal gizarteak hiru hamarkadatik gora eman ditu euskal presoei ezarritako urruntze politikaren bukaera eskatzen. Urruntze politika hori gainditzeak, baina, ez du ekarri euskal presoei ezartzen zaien eskubideen urraketaren amaiera, Sare Herritarrak salatu duenez. Izan ere, espetxe politikan «arazo berriak» daudela dio euskal presoen aldeko iniziatibak, «fiskaltza eta justizia auzitegiek sortutakoak».
Horren harira, gradu progresioen eta espetxe baimenen gainean hartutako erabakiei jarritako helegiteak aipatu ditu Sarek: «Irizpide juridikoetan oinarritu beharrean, mendekuan, gorrotoan oinarritutako espetxe politika gogora ekartzen duten erabakietan oinarritzen ari dira». Datuak eman ditu iniziatibak: Eusko Jaurlaritzak espetxeetako eskumena bere gain hartu zuenetik 42 euskal presori onartu zaie hirugarren gradurako progresioa, 28ri erabakiaren kontrako errekurtsoa jarri diete, eta hamabi espetxean sartu dituzte bigarren gradua ezarrita.
Udalerriko presoen egoera
Sei euskal preso dira gaur egun Errenteria-Oreretan: Mikel Arrieta Llopis, Aitzol Gogorza Otaegi, Eider Perez Aristizabal, Jesus Mari Etxeberria Garaikoetxea, Xabier Goienetxea Iragorri, eta Juan Manuel Inziarte Gallardo.
Arrietak gaixotasun larria du, 23 urte darama preso, eta etxean ari da betetzen zigorra hirugarren graduan; zigorraren 3/4ak beteak ditu. Gogorzak ere gaixotasun larria du, eta 23 urte darama preso: bigarren gradu arinduan da, eta etxean ari da zigorra betetzen.
Perezek 22 urte beteko ditu preso, Martuteneko espetxean dago bigarren graduan, eta ezarritako zigorraren 2/3nak beteak ditu; ama da. Etxeberriak, ordea, 20 urte darama preso, Zaballako espetxean dago, bigarren graduan. Goienetxeak 8 urte beteko ditu preso, Lannemezanen (Frantziako Estatua) aurkitzen da, eta zigorraren erdia beteta izanik baldintzapeko askatasuna eskatzeko epeen barruan da.
Inziartek, azkenik, 14 urte daramatza preso, eta egun Martuteneko espetxean dago, bigarren graduan; hirugarren gradutik bigarrenerako erregresioa ezarri dio fiskaltzak helegitea jarri ondoren, eta espetxera sartu dute berriro. Datorren urtean beteko ditu ezarritako zigorraren 3/4ak.
Errenteria-Oreretako Sarek herritarrak hitzaldian parte hartzera deitu ditu.
