June San Sebastian Seinek egin du xanistebanetako kartela
37 hautagairen artean garaile izan da San Sebastian oiartzuarrarena. Arkume Egunerako izena eman daiteke dagoeneko.
Batzordekideak, kartelaren hautaketan. Irudikoa da irabazlea. 
Xanistebanetako Jai Batzordeak erabaki du June San Sebastian Seinek aurkeztutako kartela izatea aurtengo festetako ikurra. Oiartzuarrak egindako kartelak iragarriko ditu, beraz, festak. Osotara 37 izan dira jai batzordeak jaso dituen proposamenak, eta epaimahaiak San Sebastianena onetsi du.
Sari nagusiaz gain, batzordekideek beste hainbat sari eman dituzte. Honakoa da palmares osoa:
- Irabazlea: June San Sebastian Sein. 600 euroko saria jasoko du.
- Oiartzuar onenaren saria: Eneko Salaberria Gonzalez 300 euroko saria jasoko du.
- Akzesitak (50na eurokoak): Itxaso Perez eta Olivia Cowleyrentzat.
- 100TZE sormen espazioko beka: Anari Larburu Tolosa eta Kattalin Zalakain Gonzalezentzat (elkarrekin aurkeztu zuten lana).
Arkume Eguna
Jai batzordekotik jakinarazi dute Arkume Eguneko bazkarian izena emateko epea zabalik dagoela, hilaren 20ra arte (barne). Bazkariak 35 euroko prezioa du, eta honako toki hauetan eman daiteke izena: Gurutzeko Bizardian; Karrikako Artason; Arraguako Aldegunan; Ergoiengo Auzokalten; Elizalden: txokolategian, Amazkarren, Mirenen eta Tolaitan; eta Ugaldetxoko Intxixun. Uztailaren 26 eta 27an banatuko dituzte kamisetak, Girizian, 19:00etatik 20:30era.
