Pasaian erosteagatik saria eraman dezakete bezeroek hil honetan
Laurak Bat elkarteak kanpaina berria abiarazi du. Bazkide diren establezimendu guztiek banatuko dituzte 10, 20, 50 eta 100 euroko sariak.
Elkarteko bazkide bakoitzari 100 bonu eman dizkiote. 
Laurak Bat Elkarteak Pasaiako merkataritza, ostalaritza eta zerbitzuak sustatzeko kanpaina berria abiarazi du. Hilabetea bukatu bitarte izango da martxan Urratu eta erosketa baleak irabazi! iniziatiba.
Pasaiako lau barrutietako 90 bazkideei banatu dizkiete bonuak, izan zerbitzu, ostalaritza edo merkataritza establezimendu. Horiei 100na billete eman dizkiete, eta bakoitzak erabakiko du zein irizpideren arabera banatuko dituen erosleen artean (gutxieneko gastu batetik aurrera, ausaz, lehenengo ehunei…).
Laurak Bateko kideek ohartarazi dute bazkide guztiei emandako sorta bakoitzean dagoela sariren bat. Sari horiek 10, 20, 50 eta 100 euro arteko baleak dira; saridunak diru kopuru hori gastatu ahalko du bonua banatu dion establezimenduan. Hori bai, erosketa hilaren 30a baino lehen egin beharko dela ohartarazi dute sustatzaileek, hurrengo hilabetean hasiko baitira udarako beherapenak.
