Herriartekoan, txapeldunorde
Taberna eta Chiapuso Euskadiko txapeldun izan dira eskuz binakako Trinketean; Aranburu, txapeldunorde izan da.
Herriarteko txapelketako finalean Donostiaren kontra aritu zen larunbatean Errenteria. Argazkia: Gipuzkoako Euskal Pilota Federazioa Txapeldunorde izan dira azkenean. Lan bikaina egin du txapelketa guztian zehar, baina larunbatean Oiartzunen jokatutako Herriarteko larruzko paleta eta pala motzeko gehiago izan zen Donostia. Larruzko paletan irabazi zuten errenteriakoek 35-22 utziz markagailua, eta pala motzean berriz, 10-40 galdu. Horrenbestez, garaipen bana taldeentzat, eta Donostia irabazle nabarmen, 17 puntuko aldearekin.
Finalerako ikusle ugari Madalensoron. Larruzko paletan jokatutakoa oso berdinduta egon zen hogeigarrenera arte. Hortik aurrera, gainetik izan ziren uneoro Eskisabel eta Ruben. Ibonek partida bikaina egin zuen, eta lauen artetik hoberen jokatu zuena izan zen. Rubeni kosta egin zitzaion partidan sartzea, baina hogeigarren puntutik aurrera ohiko bere mailan aritu zen. Partidaren bigarren zatian, beraz, nabarmena izan zen Errenteriaren nagusitasuna.
Pala motzean Donostiarrak gehiago izan ziren eta markagailuak alde handia erakutsi zuen: 10-40. Donostiarrak oso gainetik aritu ziren eta Yorel eta Abel partidatik atera zituen Ibargarai donostiarrak erakutsitako mailak. Ez zuten lortu errenteriakoak ohikoa duten mailan aritu eta arerioak estutzea. 2021az geroztik hirugarren urtea du Errenteriak finalerako txartela lortzen. Txapela ez dute jantzia, baina egindako lana bertara heltzeko ez da nolanahikoa.
Taberna eta Chiapuso Trinketean Euskadiko txapeldun
Txapela etxera ekarri dutenak Taberna eta Chiapuso izan dira. Eskuz binakakoan 40-27 irabazi zuten EPLEkoek Lemoaren kontra. Une bikaina bizi dute errenteriarrek eta ez zieten aurkariei aukerarik eman.
Eskuz banakakoan, berriz, txapeldunorde izan zen Aranburu. 31-40 galdu zuen Atxtxikiko Aspururen kontra. Lehia gogorra izan zuten bi pilotariek, baina Antton Aranburuk ez zuen azkenean txapela lortzerik izan.
Une honetan pilota modalitate horretako erreferentzia kluba da EPLE.
