Pasaiako Udal Ludoteketan, ikasturte bukaera aparta
Irteerak egiten hasi dira ludoteketako haurrak. Ikasturte honetan, osotara, 290 izan dira zerbitzuaren erabiltzaileak.
Ikasturte bukaerako jarduerak egiten hasi dira Pasaiako udal ludoteketan. Lehena joan den larunbatean egin zuten 8-12 adin tarteko haurrek, zerbitzua balia dezaketen koskorrenek, alegia. Hala, egun osoko txangoa egin zuten Donostiara stand up paddle ikastaroan parte hartzeko, ontzian bazkaltzera Santa Klara uhartera joateko, eta arratsaldean bainuan eta jolasean aritzeko inguru horretan. Txikienek, berriz, hilaren 17an (larunbatean) izango dute euren irteera.
Izan ere, Errekaldeko (Donostia) Monkey Park izeneko txiki parkera joango dira 4-8 adin tartekoak larunbatean. Ondoren, Lasarte-Oriako Atsobakar parkera lekualdatuko dira han bazkaldu eta arratsalde goxoa igarotzeko. 10:00etan aterako dira Pasaiatik, 17:30ak aldera bueltatzeko.
Hiru ludoteka daude Pasaian: Trintxerpe-San Pedrokoa, Antxokoa eta Donibanekoa. Gizarte eta hezkuntza ekipamenduak dira, eta udaleko Haur, Nerabe eta gazteen Sustapenerako Sailaren mende daude. Kantauri Ludiko Elkarteak kudeatzen ditu, eta Pasaiako familien artean oso harrera ona dute urtero-urtero. Udalak adierazi du horiek eraberritzen ari direla azken urteetan: “Modernizatu egin dira eta funtzionaltasun handikoak eta estetika berritukoak dira” Horien artetik Antxokoa da berriena, behin-behinekoa bada ere. Izan ere, topoko lanen ondorioz Azoka eraitsi, eta zerbitzua ematen jarraitzeko Luzuriagako etxabe bat egokitu dute, baina txandaka doaz haurrak hara, den-denentzat tokirik ez dagoelako.
