Gobernu akordioa egin dute EH Bilduk eta Elkarrekin Podemos-Ezker Anitzak
Bihar eguerdian sinatuko dute akordio hori, modu publikoan. Orduan emango dituzte, zehatz, akordioaren nondik norako guztiak.
Aizpea Otaegi eta Maite Gartzia Atlantikaldia aurkezteko atzo egindako agerraldian. EH Bilduk eta Elkarrekin Podemos-Ezker Anitzak akordioa egin dute. Hala jakinarazi dute koalizio subiranistak eta hautesle elkargoak. Baina ez dute xehetasunik zabaldu oraindik, bihar eguerdian sinatuko dutelako akordio hori, modu publikoan. Orduan emango dituzte, zehatz, akordioaren nondik norako guztiak.
Aizpea Otaegi buru duen zerrenda izan zen maiatzaren 28ko udal hauteskundeetako bozkatuena, alde handiarekin gainera. Bederatzi zinegotzi lortu ditu EH Bilduk azken hauteskundeetan, amaitzear den agintaldian jasotako babes bera, beraz. Bigarren indar politikoa, PSE-EE izan zen, eta berak ere errepikatu du zinegotzi kopurua, sei eskuratuta. EAJk ere zituen zinegotziak mantendu ditu, hiru.
Elkarrekin Errenteriak, berriz, bi zinegotzi izango ditu larunbatean bidea hasiko duen 2023-2027 agintaldian; agintaldi honetan baino bat gutxiagorekin arituko dira moreak. Azkenik, alderdi popularrak, zinegotzi bat eskuratzeko babes nahikoa lortu zuen hauteskundeetan. 2015az geroztik ez zuen ordezkaritzarik PPk Errenteriako Udalean.
Gehiengoa zuen EH Bilduk, beraz, baina ez osoa. Otaegik alkatetza errepikatzea ez zen aukerarik aurreikusten ez bazen ere, EH Bilduk eta Elkarrekin Podemos-Ezker Anitzak iragarritako akordioak bete-betean baieztatu du Otaegi, bigarrenez, izango dela Errenteriako alkate.
Agertokia ez da berria udalerrian. 2011n EH Bilduk boto gehien lortu zuen eta PSE-EEren 28 urteko hegemoniarekin bukatu. Orduan Ezker Batuak zuen zinegotzi bakarraren babesa jaso zuen. Jose Manuel Ferradas zen Ezker Batuko zinegotzia. Ondoren bi alderdien arteko akordioa heldu zen gobernagarritasuna bermatzeko. Ordutik gobernu akordioak egin dituzte, eta bai EH Bilduk, bai Ezker Batuak, Errenteria Irabaziz, zein Elkarrekin Errenteriak baikor baloratu dute formula hori.
EH Bildu eta Elkarrekin Podemos-Ezker Anitzaren artean Errenteriako Udalbatzak dituen 21 zinegotzietatik 11 batzen dituzte, gehiengo osoa. Gobernagarritasuna, beraz, ziurtatuta dute. Hala ere, Otaegik berak kanpainan zehar, zein amaitzear den agintaldiaren jardunean, nabarmen jarri du eta erakutsi ordezkatzen duen koalizioak akordio zabalen eta ezberdinen arteko adostasuna erdiesteko bideak urratzearen aldekoa dela.
