Akordiora heldu dira EH Bildu eta Podemos - Alianza Verde
'Hurbiltasun programatikoak' ahalbidetu du bi taldeen arteko akordioa. Alderdi bakoitzaren erantzukizunak zehaztu dituzte honezkero, eta 'herritarrekin eskutik' gobernatuko dutela adierazi.
Atzo, osteguna, Pasaiako EH Bildu eta Pasaiako Podemos – Alianza Verdek udal akordioa sinatu zuten datorren legegintzaldirako. Teo Alberro eta Julen Rodriguez buru, bi udal taldeek “herritarren eskutik gobernatzeko eta pasaitar guztien bizi baldintzak hobetzeko” sinatu dute akordioa. Horren arabera, Teo Alberro (EH Bildu) alkate izango da bihar, haren alderdiko hautetsiek eta Podemosekoak udalbatzarrean aldaketaren alde egingo dutelako. Gainera, gobernu zereginak konpartituko dituzte, betiere maiatzaren 28 udal hauteskundeek emandako emaitzetatik eratorria izango den ardura banaketa logikoari jarraituz: EH Bilduk zortzi eserleku bere egin zituen, Elkarrekin Podemos-Alianza Verdek bakarra. Beraz, koalizio subiranistak ardura gehienak hartuko ditu beregain.
Alderdien arabera, hurbiltasun programatikoa izan da udal gobernua proposatu eta ahalbidetzeko gakoa. Aurrerantzean, Pasaiak berriro ere “ezkerreko gobernu aurrerakoia” izango duela zin egin dute.
Printzipio eta konpromiso politikoez gain, akordioak gobernu egitura barnebiltzen du. Alegia, alderdi bakoitzak udal gobernuaren baitan izango dituen erantzukizunak xedatzen ditu. Besteak beste, EH Bilduk alkatetza, lehen alkateordea, eta lau barrutietako alkateordeak izango ditu; baita horietatik eratorritako hainbat erantzukizun eremu ere: Etxebizitza eta Ingurumena, LGBT+ eta Aniztasuna, Merkataritzaren Sustapena, Ogasuna, etab. Bere aldetik, Podemos – Alianza Verdeko bozeramailea, funtzio hori mantentzeaz gain, bigarren alkateorde izango da ere. Gainera, Kirol departamentuko zinegotzi delegatua izango da.
Lidergo irmoan, elkarlanean, Pasaiako kultura potentzialari hauspoa ematean, espazio publiko duina eraikitzean, ahots bakarra artikulatzean eta memoria, bakea nahiz bizikidetza bermatzean oinarritu dituzte datozen lau urteetako eginbeharrak.
