[Bideoa eta galeria] Gora Tirri Tarra!
Tirri Tarrak 50 urte bete dituelako ospakizun eguna dute gaur San Pedron. Aste osoko egitarauaren azken traka da.
Hau gozamena gaur San Pedron. Tirri Tarra kalean izan da, dakiena egiten: musikarekin umorea, alaitasuna, eta giro pikantea zabaltzen. Fanfarreak mende erdia bete du aurten, eta horregatik azken egunetan egitarau oso-osoa antolatu dute taldekideek nahiz sanpedrotarrek oro har. Gaur kalean instrumentuak eskuan izan direnak taldekide historikoak izan dira gehienbat, baina gazte-gaztetxoek ere atxikimendua eta hurbiltasuna adierazi diete, beharbada, sekula zuzenean ikusi ez zuten txarangakideei. Festa gaur San Pedron, handia. Gora Tirri Tarra!
Goizean txistulari eta dultzaineroak San Pedro esnarazi dute. Eguerdirako zeuden geldituak Porrusalda kalejira berezia egiteko, Tirri Tarrarekin. Haur, gazte eta ez hain gazte, kolorez bete-beteak, mende erdi historiako musikarien elkargoarekin gozatzen. Tirri Tarra plaza ere inauguratu dute eguerdian, eta poteo gartsua egin ondoren, bazkaltzera bildu dira lonja berriko zabalgunean.
Arratsaldean, 18:00etan, nekatuta izango diren Tirri Tarrakoei Tximeleta txarangak hartuko die lekukoa, eta 20:30ean dantzaldia hasiko da, Sukar taldearena.
Ondokoak, goizeko giroko hainbat irudi eta bideo bat dira, sanpedrotarrek hedabide honi emandakoak eta HITZAk jasotakoak.
