[Bideoa] Esan bezala, egin: Teo Alberro da Pasaiako alkatea
Zortzi urtez bere izan duen aginte makila eman dio gaur Izaskun Gomezek alkate berriari. Txalo, lore eta dantza artean hartu dute Alberro.
Agurra dantzatu diote alkate berriari kargua hartu ondoren udaletxetik irten denean. 
Haren hautagaitza aurkezteko ekitaldian aurreratu zuen Teo Alberro Bilbao EH Bilduren Pasaiako alkategaiak kontakizun berri baten hasiera zela hura, ‘Teo, alkatetzan’ titulupekoa. Esan bezala, egin. Gaur goizean bihurtu da Pasaiako alkate Alberro, eta gutxienez lau urtez gidatuko du herria.
Maiatzaren 28ko udal hauteskundeetan pasaitarrek bozkaturiko hamazazpi hautetsiak izan dira gaur udalbatzen osaerako plenoan, eta aretoa betetzeko adina bizilagun. Aurpegi berri asko Pasaiako udalbatzaren mahaian, eta eserlekuen aldaketa nabarmena.
Izaskun Gomez gaur arteko alkateak hartu ohi zuen eserlekua Natitxu Etxarri eta Iraitz Pazosek hartu dute, baina ez gobernatuko duen alderdiko kideak direlako, baizik eta zinegotzietako helduena eta gazteena, hurrenez hurren, direlako. Adin-mahaia deritzonaren ardura da udaletan kargu hartze ekitaldia gidatu eta botoak zenbatzea.
Kargu hartze ekitaldia
Anonimoa da bozketa, paper bidezkoa. Horiek banan-banan sartu dituzte hamazazpi kargudunek hautetsontzian, eta honakoa izan da emaitza: bederatzi Teo Alberroren alde, lau Loreto Osaren alde, eta beste lau zuri. Irakurketa bestela eginda, EH Bilduko zinegotziek alderdi horren alkategaiaren alde egin dute, eta baita Podemos-Aliantza Berdeko Julen Rodriguezek ere, elkarrekin koalizioko gobernua osatuko dutenez gero. Izaskun Gomezek ez du bere burua alkate gisa aurkeztu, eta beraz, PSE-EEk zuri bozkatu du, eta bigarren eta azken alkategaia Osa zenez gero, haren alde egin dute EAJko lau zinegotziek.
Hori horrela, babesaren gehiengo osoa lortuta, Alberro izendatu dute alkate. Azken zortzi urteetan Izaskun Gomezen eskuetan izan da herriko aginte makila, eta gaur itxi du antxotarrak bi legegintzalditako zikloa, trintxerpetarrari eskura emanda botere makil hori. Txalo eta oihu artean hartu dute udaletxeko pleno aretora bertaratutako bizilagun eta militanteek alkate berria.
Arizabalo jauregiko gela nagusia bete dute pasaitarrek. Barruan lekurik topatu ez dutenak atearen bestaldean gelditu dira kargu hartze ekitaldia jarraitzen, eta beste mordoxka batek udaletxearen kanpoaldean itxaron du alkate berria eraikinetik irteteko unea. Aginte makila eskutan, hala irten da Alberro, gobernukideen aurretik, udal eraikinetik. Atari horretan agurra dantzatu diote Donibaneko bi bizilagunek.
Dantza amaitu eta alkate berriari txapela jantzita, txalo zaparrada berria EH Bildu eta Podemos-Aliantza Berdea alderdietako kideentzat. Bederatzi zinegotzi horiek (indar nagusiko bederatzi eta alderdi moreko bat) koalizioko gobernua osatuko dute datorren legegintzaldian.
