Hiru domina Pasaia Kayakentzat Espainiako Piraguismo Txapelketan
Ur lasaietako maratoi modalitateko Espainiako Piraguismo Txapelketan arrakastatsu aritu da marea urdina.
Iñaki Fernandez eta Eukene Saez, Banyolesko pantalean, lehiaketa eremura abiatzeko prest. 
Oraingoan ere arrakasta izan du bidelagun Pasaia Kayakek Banyolesko urtegian (Girona) jokatu berri den ur lasaietako maratoi modalitateko Espainiako Piraguismo Txapelketan, eta estatu mailako beste titulu bat eta bi domina gehitu dizkio bere palmaresari, bolada onari eutsiz.
Modalitate berezia da ur lasaietako maratoia, iraupen luzekoa. Senior kategoria nagusiko palistek 25 kilometrotik gorako ibilbideak ere egiten dituzte, betiere zirkuitu baten inguruan antolatuta. Lehorrean ere, piragua bizkarretan, kirolariek lasterka egin behar izaten dituzte tarte batzuk proba mota horietan.
Ondo moldatu ziren pasaitarrak asteburuan zirkuituaren baldintzetara, eta oraingoan ere Master kategorian nabarmendu ziren bereziki, Eukene Saezen eta haren bikotekide Iñaki Fernandezen eskutik. Txapeldun titulua eta beste bi domina lortu zituzten talde urdinaren alde.
Saezek nagusitasun osoz lortu zuen txapela 15.400 metroko ibilbidean. Fernandezek, aldiz, oso lehia estua izan zuen 19.000 metroko ibilbidea betetzeko gizonezkoen proban. Aurreko bi lehiakideen ubera galdu ondoren, gogor aritu zen brontzezko domina lortzeko borrokan, Piraguismo Aranjuez, Irungo Santiagotarrak eta Lugoko Fluvial taldeetako ordezkariekin. Probaren azken zatian hartu zien aurrea, hirugarren postua eskuratuz.
Eta biharamunean, K-2 misto masterren proban, bikote pasaitarrak bere aukerak baliatu zituen garaipenaren bila, baina azkenean zilarrarekin konformatu behar izan ziren, Piragüisme Cullera taldeko irabazleen atzetik, eta bigarren postuari nagusitasunez eutsiz Piraguas Villaviciosa taldeko ordezkarien aurretik, podiuma osatuz.
Uzta oparoa egindako lan bikainaren ondorioz, eta bikaina, halaber, talde pasaitarrek beste kategoria batzuetan lortutako emaitzak, beste lau postu lortu baitzituzten guztira ‘top10’-aren barruan, beste bat master kategorian Ramon Vegaren eskutik (5. postua) eta gainerako hiru kadete kategorian, nesketan Ioar Alonso eta Irati Herce pasaitarrei esker (zazpigarren eta zortzigarren hurrenez hurren) eta mutiletan Gaizka Lopezi esker, meritu handiko zortzigarren postua lortuz, partaidetza eta maila handiko lasterketan.
