Touringen mendeurren festa 'herriaren jaia' izatea nahi dute
Bihar beteko ditu 100 urteak Touring Kirol Elkarteak. Egun handia, baina, larunbatean izango da, eta horri begira egitarau zabala atondu dute, ospakizuna ‘herriaren festa’ izan dadin
![Touringen mendeurren festa aurkeztu dute.](https://oarsoaldea.hitza.eus/site/files/2023/06/dsc_0017-1.jpg)
Mendeurrena merezi moduan ospatuko du Touringek. 1923ko ekainaren 22an sortu zuten elkartea, eta bihar beteko ditu, beraz, 100 urte . Xume ospatuko dute eguna bihar. Udaletxeko balkoi nagusian mendeurreneko bi zapiak eskegi, suziriak jaurti, eta Herriko plazan ereserki berria joko du Deiadar txarangak. Handiak herrian barrena zabalduko dute musika Touringaren mendeurrena bazter denetara heldu dadin.
Ospakizun handia baina, larunbatean helduko da, «herritarren festa» izatea nahi dute antolatzaileek. Horretarako, askotariko egitaraua ondu du touringek, herriko eragile ugarirekin elkarlanean. Kirola, haur jolasak, musika, eta herri bazkaria ez dira faltako ospakizunean.
Gaur aurkeztu dute egitaraua Asier Yeregi Touringeko presidenteak eta Ana Berridi, Patxi Benito eta Karlos Urdanpilleta zuzendaritzako kideek. Haurrentzako puzgarriak eta jolasak izango dira Fanderiako kautxuzko futbol zelaian (10:30ean hasita) Realak lagunduta, eta ordu horretan ariko dira ere Ereintzako txistulariak herriko kaleetan barrena. Fanderiako futbol zelaian Touringeko emakume beteranoen partida ere orduan hasiko da. Touringeko gizon beteranoen partida, berriz, 12:00etan izango da, eta Realeko beteranoak izango dituzte aurrez aurre.
Xanti eta Maialenek eta buruhandien konpartsak ere bat egin dute ospakizun handiarekin. 12:00etan Herriko plazatik abiatuta Fanderiako futbol zelaira egingo dute kalejira Deiadar txarangak lagunduta.
Herri bazkariaren txanda helduko da gero (14:30) Koldo Mitxelena ikastetxeko jolastokian, eta 18:30ean musikak hartuko ditu erdialdeko kaleak Piratak gidatutako Rockalearekin.
Luxuzko ginga EMKE Bandak, Andra Mari, Landarbaso, Garrintzi, Telleri abesbatzek, Ereintza Dantza taldeak eta Xanti eta Madalenek jarriko dute herri kontzertuarekin. 22:00etan izango da Herriko plazan.
Yeregik herritar guztiak deitu ditu antolatutako ekitaldietan parte hartzera eta eurekin batera ospatzera Touringentzat hain garrantzitsua den data: “Touringen festa, herritarren jaia izan dadin nahi dugu”.