Juan Manuel Inziarte euskal presoaren gradu erregresioa berretsi dute
Espainiako Espetxe Zaintzako Epaitegi Zentralak fiskaltzaren errekurtsoa berretsi du.
Martxoan egindako manifestazioa Juan Manuel Inziarte euskal presoari gradu erregresioa egin ziotela salatzeko. Juan Manuel Inziarte euskal presoari gradu erregresioa ezartzea erabaki du Espainiako Espetxe Zaintzako Epaitegi Zentralak. Hirugarren gradua jartzearen alde egin zuen Eusko Jaurlaritzaren Justizia Sailak joan den martxoan. Fiskaltzak helegitea jarri zion erabaki horri, eta Espainiako Auzitegi Nazionaleko Espetxe Zaintzako Epaitegi Zentralak ontzat eman zuen helegite hori. Martxoan bertan, espetxera itzuli behar izan zuen euskal presoak.
Espainiako Espetxe Zaintzako Epaitegiak, berretsi egin du orain erabaki hori; astelehenean eman zuen ebazpenaren berri, eta horrenbestez, Inziarteri gradu erregresioa ezarri eta bigarren graduan da orain euskal presoa. Inziartek, espetxean jarraitu beharko du hortaz.
Inziartek 68 urte ditu, eta 14 urte eta erdi daramatza espetxean. Hirugarren gradua ezarri aurretik, iktusa izan zuen, ospitaleratu behar izan zuten, eta oraindik osatze prozesuan dago. Datorren urtean beteko ditu zigorraren hiru laurdenak.
Sarek gogor salatu du erabakia: “Finean espetxeetako tratamendu batzordeak dira presoen bilakaera hoberen ezagutzen dutenak eta organo judizialak etengabeko talkan dira haien erabakiekin”. Erabakiak ez duela inongo irizpide juridiko eta justurik ere salatu du, halaber, “konfrontazioan eta mendekuan oinarritutako erabaki bat bezala uler dezakegu” .
Horrelako erabakiek ez dute zerikusirik “euskal gizartearen zati handi baten irrikarekin” Sare Herritarraren aburuz, “izan ere, gizarteak askotan adierazi du elkarbizitzarantz eta konponbiderantz aurrera egiteko beharra”.
Euskal gizarteari egon daitezkeen deialdiei adi egoteko eskatu dio azkenik Sarek, eta hilaren 30ean herriz herri egingo den Azken Ostiralean parte hartzera deitu.
