Larunbat arratsaldean, 27 traineru badian
ETE, KAE2 eta KAE1 ligetako estropadak jasoko ditu badiak. Denak erlojupeko modalitatean egingo dituzte. San Juan-Koxtapek antolatu ditu.
San Juan, Lapurdi eta San Pedro, hilaren 18ko San Pedroko estropadan. Argazkia: Josu Z. Larunbat arratsaldean ETE, KAE1 eta KAE2 ligetako estropadak jasoko ditu Pasaiako badiak, San Juan-Koxtape Arraun Elkarteak antolatuta. 17:00etan hasiko dira ETE Ligako zortzi traineruak lehian; 17:30ean da KAE2ko zazpien txanda, Fegemu bandera dute jokoan; eta 18:00etan ekingo diote KAE1ekoek (hamabi dira) euren zereginari, CMO Valves bandera irabazten saiatuko dira. Osotara 27 traineru bilduko dira badian.
Erlojupekoak izango dira estropada guztiak, banakakoak beraz. Irteera eta helmuga Donibaneko plazaren ondoan izango dira. Han hasi, eta bokalerantz egingo dute traineruak, han dagoelako kanpoko ziaboga. Beraz, ETE Ligakoek bi luze eta ziaboga bakarra (bokalekoa) egingo dituzte, eta KAE1 eta 2koek, berriz, lau luze eta hiru ziaboga (bi bokalean, eta bat irteera/helmuga denean).
KAE2koak eta ETEkoak txanda bakarrean aterako dira, denak minutuko aldearekin jarraian. KAE2n Hibaika eta San Juan B dira bertako ordezkariak, eta ETEn ez da Oarso Bidasoko trainerurik.
KAE1eko hamabi ontziak bi txandatan banatu dituzte. Lehenean, sailkapen nagusian okerren dauden sei taldeak aterako dira, eta bigarrenean beste sei traineruak, goian daudenak: Camargo, Zumaia, Arkote, San Juan, Lapurdi eta San Pedro. Bereziki ikusgarria izango da azken estropada hori, etxeko ordezkariak izateaz gain, partaideen arteko lehia estua espero delako. KAE1en jokoan izan diren lau banderetatik bi irabazi ditu San Pedrok, eta bana dituzte San Juanek eta Lapurdik.
Estropadaren, nahiz liga horien gorabeheren informazio gehiago izateko, joan ondoko webguneetara:
