Uretan jarraitu nahi du Illunbek
Kinka larrian jarraitzen du Trintxerpe-Illunbe Arraun Elkarteak bere jarduna hartuko duen egoitza bila. Konponbiderako «borondatea» sumatu dute udal aldaketarekin. Presazko irtenbidea behar dute.
Trintxerpe-Illunbe Arraun Elkartearen aldeko elkarretaratzea pasa den maiatzean. Aurten ez da uretan izango Trintxerpe-Illunbe Arraun Elkarteko seniorren ontzia. Derrigorrean hartu behar izan dute erabakia. Izan ere, portuan duen egoitza eraitsi nahi du Pasaiako Portu Agintaritzak, eremu horretan trenbide bat egiteko, eta erabaki horrek, kluba desagertzeko arriskuan jarri du, ez baitu bere jarduna eta material guztia jasotzeko bestelako egoitza alternatibarik. Iazko irailean esan zieten lokala eraitsiko zietela. Ordutik ez dute berririk, baina beldur dira edozein unetan jaso dezaketelako Portu Agintaritzaren deia lokala berehala utzi behar dutela esanez. Ez dute nora jo, ordea.
Ezjakintasun egoera horren harira erabaki zuten ez zutela KAE2 Ligan parte hartuko. Beteranoen trainerua entrenatzen eta estropadetan parte hartzen ari da, eta aste honetan bertan bukatuko dituzte batel eta trainerilla entrenamenduak gaztetxoek. Joan den hilabetean kalera atera ziren, eta hamarnaka herritar eta eragileren babesa jaso zuten, udalari irtenbide egokia eskatzeko.
Ordutik izan dira aldaketak. Udal hauteskundeak izan dira tartean, eta kolore aldaketa heldu da horiekin Pasaiako Udalera; EH Bildu da alkatetzan orain, Elkarrekin Podemos-Aliantza Berdearen babesarekin.
Elkarrizketak egingo ditu berriro Trintxerpe-Illunbe klubak udalarekin Jon Gonzalez zuzendaritzako kideak azaldu duenez: «Egungo zinegotzi bat gerturatu zitzaidan kalean, eta hark esan zidan bera izango dela Kirol zinegotzia. Esan zidan ere euren asmoa kirol eragile guztiekin biltzea dela. Gure elkarteak presazko irtenbidea behar duela gogorarazi nion, eta borondatea behintzat badute konpontzeko eta aurrera ateratzeko, aurreko udalak erakutsi ez zuena».
Egoitza, Trintxerpen
Marra gorri bat du Trintxerpe-Illunbek, Trintxerpen nahi du egoitza, «ez gaude prest barrutitik ateratzeko, gure arraun kluba deslokalizatzeko». Mahai gainean aurretik eskainitako bi aukerak mantendu ditu arraun klubak, uste baitu egingarriak direla bata edo bestea, eta bermatzen dutela, gainera, klubaren biziraupena: proiektuetako bat pantalan ondoan planteatu du zuzendaritzak; bestea, nautika azpian. Eraikinik ez dago, eta behin-behineko azpiegitura sortzea eskatuko luke bietako edozeinek. Elkarteak bizi duen kinka larriarekin bukatuko luke bi proiektu horietakoren bat onartzeak.
Marra gorri bat du arraun klubak: egoitza Trintxerpen nahi du
KAE2 Ligan ez aritzeko erabakia egokiena izan dela, egoera kontuan hartuta, uste du Gonzalezek: «Denboraldia aurrera ateratzeak 20.ooo euroko inbertsioa eskatzen du. Bizi dugun ezjakintasun egoeran ezin genuen zorpetu. Ez dugu idatzizko ezer, eta ez dakigu noiz heldu daitekeen lokala husteko agindua, eraitsi behar dutelako. Erabaki egokiena hartu genuen».
Argi dute ez dela euren esku irtenbidea, «besteen esku dago».
Haserrea agerian utzi du Gonzalezek ez dutelako aurreko udal agintarien aldetik borondaterik, ezta «irtenbide erreal» bat ere jaso: «Aurreko alkateak, Donibaneko kiroldegia eskaini zigun irtenbide gisa. Pentsa non gelditzen den uretatik hura. Adarra jotzen aritu dira, hori ez da planteamendu serioa. Uretatik gertu dagoen lokala behar dugu».
Haserreari, tristura ere gehitu dio arraun elkarteko zuzendaritzako kideak. «Pentsatu izan dugu Trintxerpe-Illunbe Arraun Elkartea desagertzea nahi zutela. Ez dago bestela ulertzerik halakoak proposatzea. Bestalde, Portu Agintaritzako zuzendaritzari eskatu nahi diogu gutxienez gurekin bil dadila».
Datorren denboraldian batel lehiaketan aritzeko aukeraz galdetuta, ontziren bat ateratzen saiatuko direla esan du Gonzalezek, «berez zaila bada jendea gerturatzea arraunera, halako egoera batean atera kontuak».
Herritarren babesa
Babesa sentitu dute, handia, herritarren eta eragileen aldetik. Baina Pasaiako beste bi arraun kluben aldetik—San Juan eta San Pedro— ez dutela babesik sumatu esan du penatuta: «Harremanetan ere ez dira jarri gurekin, elkartasuna adierazteko. Modu batera edo bestera beste arraun elkarte batzuena jaso dugu, Hibaikarena kasu. Haiei ere kaltetuko die erabakiak, ontziak ere badituztelako lokal berean».
Lanean jarraitzeko asmoa eta gogoa dutela esan du Gonzalezek. «Trintxerpen arraunean jarraitu nahi dugu, horretarako irtenbide bat behar dugu, eta Trintxerpe barruan izan behar du. Beste aukerarik ez dugu ikusten, bertako elkartea gara eta bertan jarraitu nahi dugu, Trintxerpeko arrauna bermatzen».
