Uretan sua piztera doaz Hibaikako bi ontziak
EuskoTren Ligan mantentzea dute helburu Hibaikako emakumeek. Gizonek, berriz, KAE2 Ligako goiko postuei eustea dute erronka. Egingarriak dira biak.
Haur bat Hibaikaren kamiseta soinean. Argazkia: Dani Novas Helburu nagusi bakarrarekin hasiko dute Hibaikako emakumeek bihar denboraldia: EuskoTren Ligan mantentzea. Lorgarria dela uste du Iñaki Mendizabal entrenatzaileak: «Urtean zehar egindako lana islatzen bada udaran zehar, hurrengo urtean EuskoTren Ligari eusteko aukerak ditugu».
Ligan ari diren ontziek urte batzuk daramatela nabarmen jarri du Mendizabalek, «gu, traineru berri bezala, hor mantentzen saiatuko gara». Beste ontzien eskarmentua ez, baina gogor ari dira lanean, eta ilusioa ere ez dute falta gorenean mantentzeko, «erronka bete ezean, play offa ere hor dago».
Biharkoari begira ere jarri da: «Galiziako eremua askotan oso konplikatua jartzen da; ez da erraza izaten han arrauna egitea. Ea lanak ondo eginda itzultzen garen».
KAE2 Ligako goiko postuetan aritzea du helburu, berriz, Josetxo Arrizabalaga Hibaikako gizonen entrenatzaileak, «bigarren-hirugarren postuan ibiltzea» alegia.
Eskarmentua eta gaztetasuna uztartzen ditu taldeak, eta helburuari fin erantzun diote arraunlariek denboraldiko lehen hitzorduan hirugarren sailkatuta. Beste helburu bat ere aipatu du: «Harrobiko arraunlari nahiko izatea urte osoan entrenatu ahal izateko. Etorkizuneko traineru bat osatzen ari gara. Jendez nahiko juxtu ibili gara neguan eta udaberrian, eta behar moduan entrenatzeko aukerarik ez du ematen horrek».
Daukatenarekin «moldatzen» ari direla dio Arrizabalagak. Haizea poparean hasi dute denboraldia; hala mantentzea dagokie orain. 
