Ikasleak Atlantikaldiaren bitakoraren parte bihurtu dira
Errenteria-Oreretako Lehen Hezkuntzako hirugarren mailako ikasleak irudimena eta ipuinak landu dituzte Atlantikaldiaren barruan.
Errenteria-Oreretako Lehen Hezkuntzako hirugarren mailako ikasleak irudimena eta ipuinak landu dituzte Atlantikaldiaren barruan. Horretarako, kultur topagune eta musika jaialdiaren Bitakora lelotik abiatuta, ipuinak sortu dituzte Giro pertsonaiaren bueltan. Ez dira bakarrik aritu, Aintzane Usandizagak eta Garazi Urkolak gidatu dituzte prozesuan zehar.
Gelaz gela ibili dira Usandizaga eta Urkola, eta Giroren bidez, ikasle bakoitzak bere ingurunea, bizilekua, tradizioa eta abar arakatu ditu. Emaitza, aniztasun handiko kontakizunak. Modu askean sortu dute ikasleek, eta sortutako guztia, bitakora bakarrean jaso dute, askotarikoa den kontakizun zabal batean. Gela guztietan sortutako elementuak batu eta ipuin bat sortu dute denen artean.
Bitakoran idatzitako guztia Atlantikaldian ikusteko aukera izango da. Ikasleek sortutako pertsonaiak, lekuak eta pasarteak, ipuin kontaketa dramatizatu baten bidez eskainiko dute jaialdian zehar: goizean beste ikasle batzuentzat, eta arratsaldean publiko zabalarentzat.
