Lurraren erraietara bidaia, Arditurri Egunaren eskutik
Hilaren 16an egingo dute, inoizko egitarau oparoenarekin dator, eta gainera jan edana izan ezik jarduera guztiak doakoak izango dira.
Arditurri eguna egingo dute hilaren 16an. Arditurri Eguna bueltan da hiru urteko etenaren ostean. Hilaren 16an egingo dute, inoizko egitarau oparoenarekin dator, eta gainera jan edana izan ezik jarduera guztiak doakoak izango direla jakinarazi du Arditurriko Parketxeak.
Aukera paregabea izango da Aiako Harriaren magalean dauden meategietara eta parketxera gerturatzeko. Aukeran hamaika proposamen, zein baino zen ziragarriagoa, gainera. Kaskoa jantzi eta lurraren erraietara jaisteko aukera izango dute bertaratzen diren bisitariek: “Garai batean ilunpean Arditurrin lan egiten zuten meatzariek sentitzen zutena bizitzeko aukera izango dute.
Goizetik hasiko dituzte meategietara bisita gidatuak, 10:30ean, zehazki. Luberriren eskutik, berriz, paleontolgia tailerra izango da fosilen eta garai geologikoen gainekoa. Alaia Gaztelumendik Arditurriko mural erraldoiaren proiektua azalduko du jendaurrean 10:30etik 11:30era. Abaraxka Ludotekak ere jarriko du alea Arditurri Egunean, izan ere, bera arduratuko da txikienei begirako tailerren eta jolasen antolaketaz. Horiei 11:000etan ekingo diete.
Ordu berean, normalean zabaltzen ez duten Arditurri 3 erromatar garaiko meatze galeriara bisitak hasiko dituzte, eta 12:00etan, berriz, Mineralen bila irteera gidatua hasiko da parketxetik bertatik abiatuta. Aitzindariak, ikatzaren emakumeak erakusketa bisitatzeko aukera ere izango da.
Jende andana bertaratzea aurreikusi dute antolatzaileek, eta herritar guztiek parte hartzeko aukera bera izan dezaten bermatze aldera, ez dute egun horretan erreserbarik egingo. Jardueretarako sarrerak, beraz, bertan hartu beharko dira.
Ekintza andanaren ostean indarberritzeko jan eta edateko zerbitzua ere izango da Arditurrin bertan, eta guztia girotzeko, berriz, Oidultz dultzainero taldea, Donavera eta Arretxe trikitilariak eta Izagirre pandero jotzailea arituko dira.
Egitarau zabala, askotarikoa, eta adin tarte guztiei begirakoa, beraz, hilaren 16an Oiartzunen gozatzeko aukera izango dena. Bertara heltzeko ere aholkua eman dute Arditurri Parketxetik: “Ez da aukera txarra egun horretan bide berdean barrena bizikletan edo oinez joatea. Bizikletak uzteko leku egokitua izango da”.
Informazio gehiago behar dutenek 943 49 50 69 edo 688 89 50 68 telefono zenbakietara deitu edota posta elektronikora mezua bidal dezake.
Arditurri Eguneko egitaraua
- 10:30-14:00: Meategira bisita gidatuak doan.
- 10:30-12:00: Paleontologia tailerra
- 10:30-11:30: Alaia Gaztelumendiren eskutik Arditurriko mural erraldoiaren aurkezpena.
- 11:00/11:45/12:00: Arditurri 3 Erromatar garaiko meatze galeriara bisita gidatuak (14 urtetik gorakoentzat bakarrik)
- 11:00-14:00: Jolasak eta tailerrak
- 12::00: Mineralen bila irteera gidatua
Ez da aurre erreserbarik egingo, sarrerak egunean bertan hartu beharko dira. Plaza mugatuak.
