Gizartea egituratzen duen matxismoarekin bukatzea, giltzarri
Indarkeriarik gabeko espazioak eta bizitzak aldarrikatu zituzten beste behin ere atzoko elkarretaratzean, bizitza, zaintza eta askatasuna erdigunean jarrita.
Iruñeko hilketa matxista salatu dute. Zortzi astean lau hilketa matxista Euskal Herrian. Haserrea, nazka eta nekea nabarmen egin ziren beste behin ere Oreretako Asanblada Feministak deitu zuen elkarretaratzean parte hartu zutenen artean. Zhen Jiangen hilketa gogor salatu, eta haren senide eta ingurukoei elkartasuna adierazi zieten.
Espainiako Estatuan 49 dira matxismoak erail dituen emakumeak urtea hasi zenetik; Frantziako Estatuak, ez ditu zenbatu ere egiten.
Jendarte feminista eraiki beharra urgentziazko kontua den zalantzarik ez da. Hala erakusten du errealitateak, eta estrukturala den indarkeria matxistari erantzun kolektiboa eman behar zaiola hura errotik ezabatu nahi bada. Munduko hiru emakumetik batek jasaten du indarkeria matxista Osasunaren Munduko Erakundearen arabera; datu horrek egungo gizartearen oinarriak dardarazi beharko lituzke bere horretan, ikaragarri larria delako.
Eraldaketa soziala den beste aukerarik ez da, eta horretarako baliabideak ezinbesteko dira, baina baita gizarte osoaren inplikazioa ere. Gizartearen antolaketa patriarkala jarri dute jomugan, “horrek ahalbidetzen baitu indarkeria matxista uneoro gure artean egotea, bai erakundeetan, bai kalean, bai ingurune hurbilean ere. Sotilenetik, odoltsuenera, emakumeok ehunka eraso mota jasaten ditugu egunerokoan. Indarkeria matxista ez da etengo gizartea egituratzen duen matxismoarekin amaitu arte”.
Indarkeriarik gabeko espazioak eta bizitzak aldarrikatu zituzten beste behin ere atzoko elkarretaratzean, bizitza, zaintza eta askatasuna erdigunean jarrita. Ozen esan zuten, feminismoaren bidea dela gizartea errotik aldatuko duen bidea: “Eskuina aurrera egiten ari den garai honetan, inoiz baino garrantzitsuagoa da politika feministak aldarrikatzea, bai erakundeetatik, bai herri mugimendutik, , lortutako guztiari balioa ematea eta atzerapausorik ez onartzea”.
Premiaz aldarrikatu zituzten indarkeriarik gabeko bizitzak, “bizitza duinak” eta berretsi sistema irauli arte borrokan jarraituko dutela, “feminismoak sistema patriarkala suntsitu arte”.
