Agur Lezoko bidegurutze korapilatsuari, biribilgunea egingo dute
Jaizkibel hiribidea eta Elias Salaberria kalearen arteko lotune zaila kendu, eta hamar astean biribilgunea egingo dute.
Jaizkibel hiribidea eta Elias Salaberria batzen dituen bidegurutze korapilatsua ezabatu, eta biribilgunea egingo dute bertan. Beraz, Gi-3440 errepidearen (herritik Donibane eta Errenteriarantz doana) eta Gi-2638aren (Gaintxurizketarantz doana) lotunea arinagoa izan dadin urratsa egingo dute. Lezoko Udalak eman du errepide-lan horren berri. Gipuzkoako Foru Aldundiak egingo ditu Maintzine eremuko obrak.
Lanak medio, bihartik (asteartea) aurrera trafiko mozketak egingo dituzte bidegurutze horretan. Hamar astez luzatuko dira biribilgunea egiteko obrak. Hala, Gi-2638 errepidetik herrira datozenek ezin izango dute Donibanerako bidea hartu, eta Donibane aldetik Gaintxurizketara joan nahi dutenek ere itxia izango dute egun dagoen bidea. Hala, bi kasu horietan, Altamirako biribilgunera joan beharko dute gidariek nahi duten noranzkoa hartzeko.
Lezoko Udalak, ikusita lanek eragozpenak sortuko dituztela, barkamena eskatu die balizko afektatuei.
Geziek adierazten dute lanak bitartean zer bide har ditzaketen ibilgailuek.
