'Oarso' aldizkariaren aurkezpen irekia egingo dute ostiralean
Ostiralean izango da, Niessen Kulturguneko auditorioan 18:30ean.
'Oarso' aldizkariaren aurkezpen irekia duela bi urte. Argazkia: Herri Bizia Ate joka dira madalenak, eta gero eta gertuago sumatu daiteke jai usaina. Oarso aldizkaria gertutasun horren adierazle historikoa da, eta aurten ere hutsik egin gabe ondu du haren atzean den lantaldeak ale berria. Bosgarren urtez, herriko etxe ia guztietara helduko den aldizkariaren aurkezpen irekia egingo dute. Ostiralean izango da, Niessen Kulturguneko auditorioan 18:30ean.
Gizarte bizitza xehatu, tokiko historia berreskuratu, udalerriko kultura bizitza aktiboa islatu eta pertsona esanguratsuen biografiak bildu dituzte aurtengo urtekarira, 57 kolaborazioren bidez, 352 orrialdetan.
Ostiralekoa, kolaborazio guztiak eskertzeko ekitaldia izango da, baita edukietako batzuk ezagutarazteko aukera egileen eskutik. Hala, herritar guztiak gonbidatu ditu udalak parte hartzera, “Oarso aldizkaria ezagututa, idaztera animatu eta hurrengo zenbakian kolaboratu dezaten”. Parte hartu nahi dutenek, gonbidapena jaso behar dute ekitaldira bertaratzeko hilaren 14ra arte 943 44 96 10 telefono zenbakira deituz astelehenetik ostiralera 08:30etik 13:30era edota posta elektronikora mezua bidalita.
700 ale argitaratu ditu udalak, eta 7 euroan eskuratu ahal izango dira hilaren 15etik aurrera. Halaber, Errenteriako Udalaren webgunean eskuragarri izango da doan irakurri eta deskargatzeko.
'Oarso' aldizkaria erosteko lekuak
- Beraun estankoa
- Bixen Kioskoa
- Etxenike Lotreria
- Josemi kioskoa
- Maitexa estankoa
- Mirentxu liburu denda
- Noski liburudenda
- Xenpelar kultur denda
- Txusti
- Maryam liburu denda
- Razquin estankoa
- Rojas Liburu denda
- Zu! Arreta zerbitzua
