Oarsoaldea Garapen Agentziak 2022a "berraktibazio urtea" izan dela adierazi du
Hilaren 6an, Oiartzungo Landetxen, iaz egindakoen berri emateko ekitaldia egin zuen agentziak. 30 urteko bidea dute egina jada.
Oarsoaldea Garapen Agentziak 2022. urtearen memoriaren aurkezpena egin zuen hilaren 6an Oiartzungo Landetxen. 30 urte bete ditu agentziak, eta ekitaldian hiru hamarkadako lanari keinua egin zioten. Fernando Nebreda kudeatzaileak adierazi zuen 2022a “berraktibazio urtea” izan dela, eta eragileen arteko lankidetza-esparruak indarberritzen eta sendotzen jarraitu dutela, eta erakundeek “gobernantza eta eskualde-esparrua indartzearen aldeko apustua egiten” jarraitu dutela. Aldi berean, 2022an, enpresak suspertzeko eta digitalizatzeko proiektuak egin dira, Gipuzkoako Foru Aldundiaren babesarekin. Horrez gain, Eusko Jaurlaritzaren Berpiztuk finantzatutako programak emaitza onekin gauzatu direla nabarmendu zuen: “Programa horiek baliabide garrantzitsuak eskaini dizkiote eskualdeari, eta hainbat proiektu estrategiko bultzatu dituzte ekonomia eta enplegua suspertzeari dagokionez”.
Landetxen egindako ekitaldian izan ziren Loreto Osa garapen agentziako presidentea eta Pasaiako Udaleko zinegotzia; Aizpea Otaegi Errenteriako alkatea; Mikel Arruti Lezoko alkatea; Teo Alberro Pasaiako alkatea; Julen Rodriguez Pasaiako Udaleko zinegotzia; Iraitz Pazos Pasaiako Udaleko alkateordea; Joana Mendiburu Oiartzungo alkatea; Garazi Urdanpilleta Oiartzungo alkateordea; eta Fernando Nebreda Oarsoaldeko gerentea. Horiekin batera izan ziren Oarsoaldea osatzen duten hainbat erakunde, enpresa eta eragiletako ordezkariak, eta Oarsoaldea garapen-agentziako langileak.
Iazkoaren traza nagusien berri emateaz gain, hainbat xehetasun ere eman zituzten Oarsoaldea Garapen Agentziako kideek. Horiek ikusteko egin klik esteka honetan.
Aldi berean, agentziaren 30 urteko bidea laburbiltzeko ikus-entzunezkoa aurkeztu zieten bertaratutakoei. Ondokoa da:
