Zinegotzien eskumenak asteazkenean eskuordetuko ditu Alberrok
Arduraldi osoko karguen izendapenen berri eman eta alkatetzaren eskumenak udalkideen artean banatuko ditu alkateak hurrengo plenoan.
Ezker-eskuin, Mikel Garcia, Aintzane Taberna, eta Miguel Mari Torrea dira Antxo, Donibane eta San Pedroko alkateordeak. Tartean, Teo Alberro alkatea. 
Ezohiko plenoa deitu du Pasaiako Alkatetzak datorren asteazkenerako. Udalbatzar garrantzitsua izango da hurrengoa, talde politikoen eraketaren berri eman eta, besteak beste, alkatetzari dagozkion eskumenak udalkideen artean banatuko baitituzte.
EH Bildu indar nagusiak udalbatzaren osaera baino lehen aurreratu zuen akordioa erdietsi zuela alderdiak Ahal Dugu-Aliantza Berdea taldearekin. Hala, talde moreko ordezkari bakarra den Julen Rodriguez Aboy izango da Pasaiako bigarren alkateordea, eta baita Kirol departamentuko zinegotzi delegatua ere. Gainontzeko sailak —Etxebizitza eta Ingurumena, LGBT+ eta Aniztasuna, Merkataritzaren Sustapena, Ogasuna, eta abar— bilkideen eskuetan geldituko dira. Eta baita lehen alkateorde eta barrutietako alkateordetzen ardurak ere.
Horiek, eta beste hainbat izendapen, etzi, 09:00etan, udaletxean egingo dituztenak. Horra hor gai zerrenda:
- 1.- Aurreko bilkuretako aktak, 8.a eta 9.a, irakurri eta onartzea.
- 2.- Xedapen ofizialak eta Alkatetzaren eta zinegotzi ordezkarien ebazpenen berri ematea eta Tokiko Gobernu Batzarreko akordioen berri ematea.
- 3.- Arduraldi osoko karguen izendapenen berri ematea.
- 4.- Alkatearen ebazpenak ezagutzea, arlo hauei dagokienez: Alkatetzaren eskumenak udalkideei eskuordetzea, Tokiko Gobernu Batzarreko kideak izendatzea, alkateordeen izendapenak, informazio-batzorde iraunkorren burutzak eskuordetzea, Pasaia Musikal Pasaiako Udal Fundazio Publikoa erakunde autonomoaren burutza eskuordetzea eta Pasaiako Portuko Agintaritzaren Administrazio Kontseiluan Pasaiako udalaren ordezkaria izendatzeko proposamena.
- 5.- Euskaltegirako talde politikoen ordezkariak izendatzea.
- 6.- Udalbatzako kideak izendatzea kide anitzeko organoetan udala ordezkatzeko.
- 7.- Informazio-batzorde iraunkorren ohiko bilerak arautzea.
- 8.- Talde politikoen eraketaren berri ematea.
- 9.- Informazio-batzordeetako eta erakunde autonomoetako udal talde politikoen ordezkarien berri ematea.
- 10.- Udal talde politikoen bozeramaileen batzordearen eraketa onartzea.
