Euskal ontzigintzaren ordezkari izango da Albaola Orleansen
Festival de Loire jaialdiaren 11. edizioan gonbidatu berezi izango da faktoria. Bale txalupa baten erreplika eramango dute, besteak beste.
Eguerdian prentsaurrekoa eskaini dute udaletxean. 
Festival de Loire (Orleans, Frantzia) Europako ibai festibalik handiena da. Bi urtean behin, 700 marinel eta 220 ontzi tradizionalez gain, milioi erdi bisitari baino gehiago jaso ohi ditu 4 egunetan. Edizio bakoitzean itsasoarekin lotura duen kultura bat gonbidatzen dute Orleansera euren ibai ondarea ezagutarazteko, eta aurtengoan (hamaikagarrena izango da) Euskal Herria izango da, Albaolaren ordezkaritzarekin.
Uretan parte hartzeaz gain, Albaolak presentzia handia izango du lehorrean ere. Bale txalupa baten erreplika erakutsiko dute bertan, eta bi erakusketa ere prestatuko dituzte jaialdirako. Horrez gain, erriberako arotzeriarekin lotutako lanbideen zuzeneko erakustaldia ere egingo dute pasaitarrek.
Gonbidapena formala eta aurrez aurrekoa egiteko asmoz, Orleanseko Udaleko eta Festival de Loire-ko antolakuntzako ordezkariak Pasaiara etorri dira. Gaur bertan, Albaola Itsas Kultur Faktoria bisitatu, badia ezagutu eta, ondoren, udaletxean izan dira ongietorri instituzionala jasotzeko. Bertan egin die agurra Teo Alberro alkateak, udalbatzako gainontzeko alderdietako ordezkariekin batera.
