Indarkeria matxistarekin lotu dute astearteko Antxoko erasoa
Gizonezko bat labanaz zauritu baino lehen, emazte ohiari etxeko giltzak lapurtu eta sua piztu zuen pisuan. Bertatik lapurtu zituen labanak.
Astelehenetik astearterako gauean, 02:30a aldera, gizonezko bat atxilotu zuen Antxon Ertzaintzak, giza hilketa saiakera leporatuta. Orduko hartan ikerketa zabalik zenez gero, ez zuen informazio gehiago eman Eusko Jaurlaritzako Segurtasun Sailak, baina detaile gehiago eman dituzte orain. Artean, indarkeria matxistarekin lotu dute gertakaria.
Gau hartan atxilo eramandako erasotzaileak 27 urte ditu, eta ez diote soilik giza hilketa saiakera egotzi, genero indarkeriako delitu bat ere leporatu diote. Izan ere, bidegorri ondoko arma zuri bidezko erasoa baino lehen, emazte ohiari haren etxeko giltzak lapurtu eta bertako objektu batzuei su eman zien. Labanak ere bertatik lapurtu zituen gero gizonezkoa erasotzeko.
Gizonezkoa asteartean bertan epaitegira lekualdatu eta gero, asteazken arratsaldean kartzelan sartzea dekretatu zuten. Aditzera eman dutenez, hainbat deliturengatik aurrekari ugari ditu erasotzaileak.
Hilketa saiakera
Goizaldeko erasoari buruzko xehetasun gehiago eman ditu Segurtasun sailak. Antza, lekuko batzuek erasoa ikusi zuten. Lurrean gizonezko bat zegoen, eta esku banatan labanak zituen beste bat erasoka ari zitzaion. Inguruan bizikletan zebilen gizonezko batek Ertzaintzari abisua eman eta zonaldetik igarotzen ari zen anbulantzia bat geldiarazi zuen.
Berehala bertaratu ziren, gutxienez, hiru anbulantzia eta dozena erdi ertzain-kotxe. Erasoa izandako lekuan bertan atxilotu zuten delitugilea, eta baita biktima artatu ere, osasun zerbitzuetako langileek. Bertatik Donostia ospitalera lekualdatu zuten anbulantzia medikalizatu batean.
Bularraldean zauriturik hartu zuten gizonezkoa ospitalean, zainketa intentsiboetako unitatean. Haren osasun egoerari buruzko informaziorik ez dute eman Segurtasun sailetik.
