Goiatz Aduriz eta Karina Korro ekintzaileek euren ereduaren berri eman dute
Negozioak martxan jarri dituztenen esperientziak partekatu nahi ditu Oarsoaldea Garapen Agentziak, Oarsoaldea Ekin! programaren bidez.
Oarsoaldea Ekin! enpresa ideiak abian jartze laguntzen duen egitasmoa da, Oarsoaldeko Garapen Agentziak garatutakoa Gipuzkoako Foru Aldundiarekin lankidetzan. Horren harira, jada euren ideiak egi bihurtzen ari direnen elkarrizketa inspiratzaileak plazaratzen ari da agentzia. Oarsoaldea Ekinen bigarren solasaldia Goiatz Aduriz eta Karina Korroren artekoa da.
Aduriz Papurrak Ogi eta Goxo Faktoriako (Oiartzunen dago) arduraduna da, eta Korro, berriz, Taqueria Txiki Takoko nagusia (Errenteria-Oreretan). Hala, Oarsoaldea Ekin!-en asmoa negozio ideiak abian jartzea bada, jada hori egin dutenen esperientziaren berri izan daiteke ikus-entzunezko moduan zabaldu duten elkarrizketan. Arrakasta bai, baina haien kezkak, zalantzak eta zailtasunak ere ezagutu ahal izango dira protagonisten hitzetan, negozio ideia bat abian jartzea erabakitzen duten beste pertsonen erreferentzia izan daitezen.
“Tokiko merkataritzak udalerri baten kultura, nortasuna eta komunitatea indartzen ditu. Enplegua sortzeaz gain, gizarte harremanak sustatzen ditu, herritarren bizi kalitatea hobetzen duten zerbitzuak sortzen ditu, udalerriari ez ezik, udalerria osatzen duen komunitateari ere balioa emanez. Familia-negozio txikiek, herriko eta auzoko dendek, hiria aberasten laguntzen dute beren eskaintza eta zerbitzuekin. Izan ere, nork bizi nahi du bizirik ez dagoen auzo batean?”, esan dute Oarsoaldea Garapen Agentziatik.
Iragarri dute, elkarrizketen ziklo honetako hurrengo ataletan “beste gai garrantzitsu batzuk” landuko dituztela, hala nola ekintzaileen lurralde aniztasuna, edo emakume ekintzaileen ikusgarritasuna.
