Zero Zabor Uretan kanpaina Pasaiara iritsi da
Etxean izango da 'Mater' ontzi museoa hilaren 28ra bitarte. Bi gonbidatu berezi ditu aurten kanpainak: 'Zabor' munstroa eta 'Bio' dama.
Zero Zabor Uretan kanpainako ordezkariak. Atzean, 'Bio' dama eta 'Zabor' munstroa. 
Mater Ontzi Museo Ekoaktiboaren Zero Zabor Uretan kanpaina Pasaiara iritsi da jada. Itsas zeharkaldiaren bide erdian, ontzia etxera itzuli da, eta bertan izango da hilaren 28ra arte. Bitarte horretan publiko guztientzako doako jarduerak eskainiko ditu ontziak, besteak beste, museora bisita gidatuak, itsasora irteerak, tailerrak eta jolasak portuan, edota proiekzioak ontziaren kubiertan.
Aurreko hilabeteetan ez da falta izan marinel ondarea babesteko tokiko konpromisoa eta inplikazioa: udalek, ikastetxeek, kultur elkarteek eta komertzioek itsasoaren zaintzaile ere izan nahi izan dute, aktiboki parte hartuz. Edizio honetan, bi protagonista oso berezi izan ditu ontziak: Zabor, itsasoan bildutako hondakin plastikoekin egindako itsas zaborren munstroa, “gizarte gisa ditugun kontsumo ohitura suntsitzaileen ondorio”; eta Bio, biodibertsitatearen dama, algaz, koralez eta kakorratzez ehundutako hainbat espeziez osatua, bizidunaren zaintzaren garrantzia adierazten duena.
Bi figura horiek erraldoi bihurtu ditu Materrek helburu batekin: “Gure kontsumo arduratsuaren bitartez hondakinen eragin negatiboa murrizteko eta bizitzaren zaintza areagotzeko mezua helarazteko”. Ahalegin horren baitan, ikastexeetan haurrek kartel deigarriak sortu dituzte kartoizko euskarrietan, itsasoaren zaintzaren ideia islatuz eta Zabor desagerrarazi eta Bio zaintzeko mezuak helaraziz.
Jarduerei buruzko informazio guztia Zero Zabor Uretan kanpainaren webgunean kontsulta daiteke, eta erreserbak egiteko telefono honetara dei dezakete interesdunek: 619 81 42 25.
