Dultzaina doinuak nonahi belarriak goxatzeko
Oidultz elkarteko dultzaineroak xanistebanetan bazterrak girotzen ibiliko dira. Erronka bat dute, gazteak taldera erakartzea. Herritik kanpo ere arituko dira, Pasai Donibanen eta Goizuetan tarteko.
Oidultzeko dultzaineroek xanistebanak ez ezik, beste hainbat txoko ere girotuko dituzte uda honetan. Dultzaina doinuek ez dute hutsik egingo xanistebanetan. Altzibar eta Iturriotzen izango dira Oidultz elkarteko kideak abuztuaren 2an, eta 4an, berriz, plaza girotuko dute.
Garrantzia eman dio elkarteko lehendakari Lorena Zalakain Lopezek 2an Aiton Etxen egingo duten emanaldiari: «Geldialdia egiten dugu bertan, beraien gustuko abestiak jotzeko».
2017an sortua, 23 bazkide ditu Oidultzek, Soinueneko ikasleak izandakoak denak, eta anitza da taldea adinari erreparatuta: «Gazteenek 8 eta 16 urte artean dituzte, eta helduenak 70. Oiartzuarrak, errenteriarrak, donostiarrak eta lezoar bat ere badago tartean».
Ez dutela gazteak taldera erakartzea lortzen dio, eta erronka bihurtu zaie hori: «Hernanin eta Tolosan gazte talde politak osatu dituzte, Oiartzunen, berriz, gazteak falta zaizkigu. Izena ematen duten denak adinekoak dira. Oraintxe bertan taldean ditugun bi gazteenak danbor jotzaileak dira, eta ni naiz dultzaina jotzaile gazteena, 45 urterekin».
Dultzainak zer duen berezia galdetuta, musika tresna «erosoa» dela esan du Zalakainek: «Bolumena du, eta beraz, erraz entzuten da; horrek ere badu bere pega, batzuetan altuegia da bolumena. Eskusoinua ere jotzen dut, baina hori ezin dut mendira eraman. Dultzaina bai, motxilan sartuta».
Konstantzia, beharrezkoa
Jotzen zaila den galdetuta ezetz dio oiartzuarrak. «Konstantzia behar da, hori bai. Aste batetik bestera ez badut jotzen, muturrak txikitzen ditut jotzerakoan berriz ere, eta ezin dut lau kantu baino gehiagorekin. Jarraipena eskatzen du, maiz jo beharra, baina zaila ez da».
Herritik ere ateratzen dira dultzaina doinu ederrak batera eta bestera eramateko: «Lezoko mendekoste eta santakrutzetan joatzen dugu diana, igandean Pasai Donibanera joango gara, eta abuztuaren 12an, berriz, Goizuetako jaietara. Horiek hitzordu finkoak dira jada».
Urrutiena, berriz, Torroella del Montgri (Girona, Katalunia) heldu dira: «Guardian (Araba) egiten den dultzainero topaketan parte hartzen dugu, eta han ezagutu genuen herri horretako talde bat. Ihoteetan Oiartzunen izan ziren, eta iaz, gu izan ginen euren herrian. Zoragarria izan zen esperientzia, gure oso estilokoak direlako, talde herrikoia».
Sinistuta dago herrian bere lekua hartu duela dultzainak: «Auzo guztietako festetan jotzen dugu eta kontuan hartzen gaituzte». Elkarteak ateak parez pare zabalik dituela esan du lehendakariak, «dultzaina jo nahi duen ororentzat»
