[Argazkiak] Sardina erreen usainak ehunka erakarri ditu aurten ere
San Pantaleon ospatu zuten atzo Donibanen, eta, aurreikus zitekeen moduan, arimarik ere ez zen kabitzen barrutian.
Hamarka baino, ehunka lagun atzo ere Pasai Donibanen. Ezin besterik espero santioetako San Pantaleon egun handian. Are gutxiago eguraldia aldeko izanda eta kontuan hartuta doako arrai erreen banaketa egiten zutela bizilagunek barrutiko alde zaharreko ia txoko guztietan.
Santiago plaza, jakina, jaialdiaren epizentro. Baina inguruko kaleak ere leporaino bete zituzten sanjuandar nahiz bisitariek. Barruti arrosaren kaleetan barrena hizkuntza aniztasuna ia egunero antzeman badaiteke ere, atzo are eta agerikoa izan zen hori. Baita kamera eskutan jaialdia geroagorako gorde nahi izan zutenena ere.
Atzoko 15:00etan herriko kuadrillek sardinak eta ikatza jaso zituzten Arizabalo Jauregian, eta 19:00etarako prest zuten jada, gehientsuenek, sardina-jana. Berehala hasi zen Javi DJa plaza musikaz girotzen, eta luzerako eman zuen ostegunak. Gaur, 17:00etan, goitibeherak eta txikientzako tailerra, eta askoz gehiago. Hemen klik eginda kontsulta daiteke egitarau osoa.
Horratx, atzokoak Donibaneko hirigune historikoan utziriko une batzuk, argazkitan.
