Agur esan dio Landarbasok Baliri, euskal musikan historia eginda
Errenteriar abesbatzak Grand Prix sari nagusia, lau garaikur eta hiru urrezko domina ekarriko ditu etxera. Orain, turismoaz gozatzera.
Motxila bete sari bueltatuko dira etxera. 
Landarbaso Abesbatzak Bali uhartea utzi du, inoizko garaikurrik garrantzitsuena poltsikoratuta: Asiako Choral Grand Prixeko garaipena. Ez hori bakarrik, Iñaki Tolaretxipiren abesbatzak nazioarteko beste lehiaketa handi batean hartu zuen parte larunbatean: International Bali Choir Festivaleko Grand Prixa. Azken horretan irabazi ez, baina errenteriarrek euren palmaresari beste bi lehen sari gehitu zizkioten.
Larunbateko lehiaketaren irabazlea Indonesiako Diponegoro Engineering Student Choir abesbatza izan zen. Landarbasok, baina, bi lehen sari erdietsi zituen abesbatza mistoen eta musika folklorikoaren kategorietan, eta beste hiru urrezko domina aitortu zizkieten epaileek euskal ordezkariei.
Baliko azken lehiaketa hori ez zitzaien berria Errenteria-Oreretakoei, 2019an Grand Prixa eskuratu baitzuen abesbatzak. Aurten, Rachmaninoven Bogoroditse Devo errusierazko abestiarekin eta Jancevskis letoniarraren Atsaslums lanekin lehiatu dira.
Errekonozimendu gehiago
Aipaturikoa gutxi balitz, joan den ostiralean arrakasta gehiago lortu zituzten etxekoek kategorien araberako lehiaketan. Tolaretxipiren taldea bigarren sailkatu zen musika sakratuaren modalitatean, 100etik 87,52 punturekin, irabazle italiarrengandik 1,15 puntura. Koru mistoen kategorian, non taldeak itxaropen handia zuen “bikain” gisa baloraturiko interpretazio baten ondoren, lehen postua lortu zuten, 88,20 punturekin.
Baina, zalantzarik gabe, gaueko sorpresa nagusia musika folklorikoaren modalitatean iritsi zen. Euskal tradizioa eta baserritar jantziak Asiako kultura ikusgarriaren aurka lehiatu behar ziren, eta gaueko baloraziorik altuena lortu zuten euskaldunek: 94,07 puntu. Hautaturiko lanekin, beraz, bete-betean asmatu zuten: Aritz adarrean-Kattalin, Ama begira zazu eta Akerra ikusi degu. Taldekideek baietsi dutenez, “zirrara” sortu zuten horiek epaimahaikideen artean.
Azkenik, hiru kategorietako bakoitzean 80 puntu baino gehiago lortu zituenez, Landarbaso Abesbatzak urrezko hiru domina berri jaso zituen larunbatean. Lorpen guzti horiekin, bete-beteta dakarte motxila etxera. Horren aurretik, baina, atseden hartu eta indonesiar paisaiez gozatzeko parada izango dute. Bali atzean utzi eta beste uharte batean egingo dute orain geldiunea: Javan. Egunotan zertan ibiliko diren aurreratu dute: “Herrialdeko atrakzio turistiko batzuk bisitatzera eta oraindik egun asko iraungo duen poztasun sentsazioaz gozatzera goaz”.
