Santakrutzetan zehar puntu morea izango da Pikukalen
Udal ordezkariak eta herriko eragileak jai berdinzaleago batzuen alde egiteko proposamen sorta eta protokoloa lantzen hasi dira.
Udal ordezkariak Gaxuxa, Piztu Lezo eta Emakume Taldeko ordezkariekin elkartu ziren joan den astean. 
Irailaren 13an hasi eta 17an bukatuko dira Lezoko Santakrutz Jaiak, eta horietan berdintasunaren alde egin eta festa askeagoak antolatu ahal izateko bilera izan dute udalak eta herriko eragile feministek. Hala, Eneritz Arruti, Feminismoko zinegotzia eta berdintasun teknikaria, eta Mireia Kuesta zinegotzia Gaxuxa Emakume Taldeko eta Piztu Lezoko bina ordezkarirekin eta Emakume Taldeko ordezkari batekin elkartu ziren joan den astean.
Udaleko kideek herriko jaietarako zenbait proposamen landu zituzten aurretik. Proposamen horiek bilerara eraman eta gainontzeko kideei azaldu zizkieten, elkarlanean osatu eta moldatzeko gonbidapena eginez. Horrela, besteak beste, santakrutzen aurretik ahalduntze tailerrak eskaintzea erabaki zuen mahaiak, bai adin txikikoentzat, nahiz adinez nagusientzat. Bestalde, larrialdi mahaia koordinatzeko bilera bat egingo da, eta tabernariekin ere hitzordua jarriko da berdintasunerako protokoloaren berri emateko.
Jaietan informaziorako puntu morea jarriko da Pikukalen, eta telefono zenbaki bat egongo da eskuragarri eraso matxistaren bat gertatuko balitz, biktimek aditu baten arreta zerbitzua jasotzeko aukera izan dezaten (irailaren 15ean eta 16an, 00:00etatik 06:00ak arte).
Azkenik, eragileen eta udalaren artean Lezoko herritarrei zuzenduko zaien protokoloaren lehen zirriborroa osatu dute, eraso baten aurrean nola jokatu behar den “modu zuzenean, argian, eta ulerterrazean” adieraziko duena. Santakrutzen programarekin batera etxez etxe banatuko da protokoloa, eta kartel formatuan ere eskuragarri egongo da taberna eta herriko hainbat gunetan kokatzeko.
