Xanistebanengatik, aldaketak trafikoan eta hondakinen bilketan
Manuel Lekuona etorbidea itxita egongo da trafikoarentzat. Hondakinak jasotzeko egutegia eta kokalekuak zehaztu ditu udalak.
Gaur hasiko dira xanistebanak, eta jai eremu ezberdinen artean oinezkoen joan-etorriak erraztu era segurtasuna hobetzeko Manuel Lekuona etorbidea trafikoarentzat ixtea erabaki du udalak. Hilaren 6ra arte, beraz, ezingo da ibilgailurik bertatik ibili.
Kale horretan edo Yon Oñatibia kalean garajean duten bizilagunek Rafael Pikabea kaletik sartu beharko dute euren autoekin. Oiartzungo Udalak ohartarazi du horretarako baimena lortu ahal izateko Udaltzaingora jo eta bertan baimen berezia eskatu beharko dutela.
Bestalde, hondakinen bilketari dagokionez, aldaketak izango dira horien kudeaketan ere. Zakarra gauez bildu beharrean goizean bilduko da, herriko plaza inguruko kaleetan, gaurtik hilaren 7ra. Horra puntuak: Donibane, Mendiburu, Putxutxoerreka, Aialde, Kontzejupe, Kontzejuerreka, Rafael Pikabea etorbidea (1, 3, 5, 7 eta 10), Done Eztebe, Landetxe, Kazkazuri eta Euskal Herria.
Bizilagunek 08:00etatik 09:00etara utzi beharko dituzte hondakinak zintzilikatzekoetan eta biltzaileak 09:00etan hasiko dira bilketa lanetan. Jarraian, jasoko diren hondakin moten ordenaren zerrenda:
- Hilak 3, osteguna, goizez (08:00-09:00): organikoa
- Hilak 4, ostirala, goizez (08:00-09:00): ontzi arinak
- Hilak 5, larunbata, goizez (08:00-09:00): organikoa
- Hilak 6, igandea, goizez (08:00-09:00): errefusa
- Hilak 7, astelehena, goizez (08:00-09:00): organikoa eta gauez (20:00-22:00) ontzi arinak
