[Argazkiak] Espazio seguruen adibide, bazkari begano-feminista
Kontzejupeko plazan egin dute Oiartzungo Feministen Asanbladak deitutako bazkaria. Ondoren, 17:30ean, Magma Mia bakarrizketaz gozatuko dute.
Baserritar Egunean bazkari begano-feminista antolatu du Oiartzungo Feministen Asanbladak. Eguerdian, 15:00ean, 70 lagun inguru bildu dira Kontzejupe plazan; eguraldiagatik leku aldatu egin dira.
Asteazkenean, agerraldia egin zuten asanbladako kideek eta Xanistebanak aske gozatu nahi zituztela aldarrikatu zuten. Horrez gain, protokolo feminista ondu dutela oroitu zuten. Erasoren baten lekuko edota biktima izanez gero zer-nola jardun azaldu dute bertan. Erasotutakoa artatu, babestu eta erasotzailea eremutik kanporatzea oinarrizkoa izango da kasu horietan.
Gaurko egitaraua ez dute bazkariarekin bukatuko eta, 17:30ean, Magma Mia bakarrizketa eskainiko du Beatriz Egiazabalek. Hasiera batean, eliza ondoan egitekoa da, baina izan daiteke Kontzejupeko plazara lekualdatzea.
