[Bideoa] Etxean dira; eta bero hartu dituzte
Herrira iristean harrera beroa egin diete lagun, senide eta herrikideek. "Ez dugu hau berehalakoan ahaztuko. Maite zaituztegu!".
![](https://oarsoaldea.hitza.eus/site/files/2023/08/harrera-landarbaso.jpeg)
Ez zuten halakorik espero. Oraindik bueltako bidaian zirenean hitz egin zuen Landarbasoko kideekin HITZAk, eta inolako harrera ez sorpresarik espero ez zutela aitortu zuten. “Batzuk Andoainen jaitsiko dira autobusetik, gu Errenterian, eta bertatik etxera; ez dugu plan berezirik”.
Bada, herrikideek bestelako asmoak zituzten. Ibilgailua Niesseneko biribilgunera heltzerako ikusi ahal izan zituzten bertako plazan, pankarta eta ongietorri nahiz zorion mezuak eskutan, gertukoenak. Senide, lankide, lagun eta herrikideak bertan ziren euren esperoan, abesbatzari merezitako aintzatespena egiteko asmoz.
“Ez dakigu nola prestatu ahal izan duzuen hau guk ezer jakin gabe”, aitortu zuen omenaldian lur hartzean Iñaki Tolaretxipi zuzendariak, nabarmen hunkituta. Agurra dantzatu eta bertsoak abestu zizkieten artistei aitortza moduan, plaza bete txalo.
32 orduko bidaia atzean, eta oraindik lortutako garaipenen ajearekin, hainbeste asimilatzeko prozesuan dira oraindik Landarbasokoak. “Ez dugu hau berehalakoan ahaztuko”, mintzatu dira. “Maite zaituztegu!”.