Igandean, 75. Xanisteban Txirrindulari Saria Oiartzunen
Probak eragina izango du trafikoan, eta aldaketa horien berri eman du Udaltzaingoak. Ia auzo guztiak zeharkatuko dituzte txirrindulariek.
![](https://oarsoaldea.hitza.eus/site/files/2023/08/xanisteban-txirrindulari-saria.jpeg)
Igandean, 10:00etan, lehiatuko dute 75. Xanisteban Txirrindulari Saria, Oiartzungo xanistebanen testuinguruan. Euskal Federazioak 23 urtez azpiko eta elite mailako txirrindularientzat ematen duen Euskal Saria da, eta OTXE da herriko lasterketaren antolatzailea. Berritasun anitz dakartza aurtengoak. Hemen klik eginda zabalduko den erreportajean irakur daitezke horiek.
Probak eragina izango du Oiartzungo trafikoan, eta aldaketa horien berri eman du Udaltzaingoak. 10:00etatik 13:00etara hainbatetan zeharkatuko dituzte txirrindulariek herriko auzo ia denak. Ibilbidean aldaketak egin dituzte aurten, eta bi zati izango ditu lasterketak: lehenengoan Oiartzun inguratuko dute, eta bigarrenean, (11:20tik aurrera) Done Eztebe plazatik eta herriko erdigunetik pasako dira hainbat aldiz eta hesituta egongo da ibilbidearen zati hori.
Trafiko mozketak eta Lurraldebus autobusik ez
Lasterketak irauten duen bitartean, trafiko mozketa laburrak egingo dituzte, txirrindulariak pasatzen diren bitartean. Bideak, hala ere, ez dira guztiz itxiko.
Edozein kasutan, Lurraldebusen autobusik ez da izango 3 orduz: 10:05ean izango da azken zerbitzua eta 13:25ean ekingo dio berriz garraioak ohiko ibilbideari. Bitartean autobus hori Donostiatik Lartzabaleraino bakarrik ibiliko da.
Xorrola eta Taxibusa egongo dira proba martxan dagoen bitartean ere (ordutegian atzerapenak izan daitezke). Erdigunera joateko zerbitzu horiek erabiltzea edo oinez egitea gomendatu du Oiartzungo Udalak.