[Argazkiak] Hasi da giroa Oiartzunen, sagardo eta pintxoak lagun
Baserritar egunean plaza hartzeko atsedena eman die behintzat euriak. Berehala jakingo dute herriko mokadu eta sagardo onenak zeinenak diren.
Horiek dastatzen dituztenek bozkatu ahalko dute sagardo onenaren alde. 
Hogeita bigarren aldiz egiten ari dira gaur goizean, Done Eztebe plazan, Inaxio Uharte Sagardo Lehiaketa. Ohi bezala, jakina, herriko elkarte eta tabernek egindako pintxoen lehiaketak lagunduta. Horiek biak, Ibargain elkartearen antolakuntzapean.
Baserritar eguna da gaur herrian, askotariko jardueraz —eta euriz— apaindurik hasi dena. 12:00etan pintxoak banatzeari eta lehen tragoak zerbitzatzeari ekin diotenean, behintzat, tregoa eman die euriak oiartzuarrei. Bazen jendea plazan ordu horretan, baina bereziki Kontzejupea da bete dutena, bertan baitzegoen jatekoa. Eta edan aurretik, jakina, sabelak bete behar.
Giro ederra herriko plazan, HemenGuk bertako produktuen azokak eta musikak lagundurikoa, gainera. 10:30ean abiatu dira Oiartzungo Herri Musika Eskolakoak kale bueltan, eta 12:00etan, erreleboa hartuta, Odultz Dultzaina Taldeak ekin dio berdinari, Done Eztebetik abiatuta.
Pintxo eta sagardo lehiaketen sari banaketa 13:15ean egitea aurreikusi dute, plazako oholtzan bertan. Orduan jakingo dute sasoiko sagardo ekoizlerik onena zein izan den, eta baita herriko zein tabernak dituen mokadu goxoenak.
Hemen kontsulta daiteke xanistebanen egitarau osoa.
