[Argazkiak] 'Hori' da 'hori' bukaera!
Xanistebanen azken egunean, 730 lagun elkartu ditu arkume janak. Ardi Latxa elkarteak antolatutakoa erraldoia izan da aurten ere.
730 mahaikide elkartu dira gaur horiz jantzita. 
Milatik gertuago ehundik baino. 730 lagun bildu ditu aurten Ardi Latxa elkarteak antolaturiko arkume jateak, Madalensoro pilotalekuan. Iaz ez ziren 700era iritsi, eta aurten parte hartze txikiagoa espero zuten. Itzela, sorpresa.
Hori kolorea nagusitu da gaur goizean zehar Oiartzunen, bazkarian parte hartu duten horiek guztiek soinean baitzeramaten kolore horretako kamiseta. Kaleak utzi eta hori-tanta solteek urmaela osatu dute, 14:30ean, pilotalekuan.
Oiartzuarrak izanki, patxadaz hartu dute aurten ere bazkaria mahaikideek. 17:00etan oraindik arkume platerak husten ari ziren, txintxo-txintxo, organikoaren edukiontzian. Oraindik postrea jan gabe ziren, beraz.
Ondoko argazkietan ikus daitekeen moduan, presarik ez dute, baina. Gaur bukatuko dira xanistebanak, eta azken unera arte disfrutatu behar, urtebete itxaron beharko baitute berriro herriko jaiekin gozatzeko.
