Gazteek bertan eros dezaten sustatzeko kanpaina berria
Udalak bonu kanpaina berria abiaraziko du. Ahalegin berezia egingo dute 18 eta 35 urte bitarteko gazteen kontsumo ohituretan eragiteko.
Errenteriako Udalak dei egin die bertako merkatari, ostalari eta zerbitzu emaileei bonu kanpaina berrian izena eman dezaten. Irailean hasiko da hori, eta 18 eta 35 urte bitarteko bizilagunei egongo da bereziki zuzenduta.
Gazteen kontsumo ohituretan eragin nahi du bonuen iniziatibak, bertako erosketak bultzatzeko xedez. Bonuen kudeaketa Bizi Errenteria esku telefonoetarako aplikazioaren bidez egingo da, iaz bezala.
Izena eman ondoren, aplikaziorako sarrera edukiko dute establezimenduek, euren izena Bizi Errenteria web orrian argitaratuko du udalak eta bonu kanpainaren publizitate materiala jasoko dute.
Nork eta nola parte hartu
Atxiki daitezkeenak honakoak dira: Bonuen bidez ondasun edo zerbitzuak erosteko aukera ematen duten Errenteriako merkataritza, zerbitzu, ostalaritza, eta jatetxeetako txikizkako establezimendu guztiak. Deialditik kanpo geldituko dira, beraz, firma handien, eta espainiar estatuan edo nazioartean ezarpen handia duten enpresa filialak, baita azalera handikoak.
Eskaerak telematikoki egin daitezke formulario hau beteta, baita aurrez aurre ere, Errenkoalderen bulegoan eta ZU! arreta zerbitzuan. Atxikitzeko prozedurari buruzko informazioa eta beste xehetasun gehiago, udalaren egoitza elektronikoan.
