Antzerki testu laburren lehen lehiaketa abiarazi dute Lezon
Lezoko Udalak eta Hika Teatroak martxan jarritako proiektua da. Lehen fasean sei finalista hautatuko dituzte.
Hika Teatroak eta Lezoko Udalak, elkarlanean, lehen Antzerki Testu Laburren Lehiaketa antolatu dute. Proiektua antzerkigintza eta zaletasuna sustatzeko bi eragileek martxan duten Txalostean programaren aterkipean kokatzen da.
Lehiaketara aurkezten diren lan guztien artean sei aukeratuko ditu epaimahaiak, eta horien artean, gutxienez bi 35 urtetik beherako sortzaileek idatzi izana lehenetsiko da. Halaber, saritutako lauk, gutxienez, euskarazko lanak izan beharko dute. Saritutako idazleen sexuan ere parekotasuna bermatzen ahaleginduko dira antolatzaileak.
Hautaturiko sei testu finalistak bigarren fase batera pasako dira. Horretan, irakurketa dramatizatu estiloan, urriaren 7an izango den kaleko jaialdian lehiatu beharko dute batak bestearekin. Lehiaketa horretara bertaratzen diren ikusleek aukeratuko dute testu irabazlea, bozka bidez.
Lehiaketaren oinarriak
Euskal Herriko edozein biztanlek aurkez ditzake testuak. Hori egiteko epea irailaren 14ko 14:00ak arte izango da zabalik, eta testuak PDF formatuan bidali beharko dira posta elektroniko bidez.
Atxikitako PDFarekin batera, 8-10 lerro bitarteko sinopsia ere eskatu dute antolatzaileek, eta baita pertsonaietako bakoitzaren 3 lerroko deskribapena ere. Antzerki testuaren luzerari dagokionez, gutxienez 10 eta gehienez 15 minutuko iraupena izango duten antzerkien testuak jasoko dituzte. Halaber, gehienez ere bi pertsonaiak osaturiko istorioak beharko dute izan.
Sariketari edo balizko sariei buruzko xehetasunik ez du eman, oraingoz, Lezoko Udalak.
