Hegaztiei buruzko erakusketa eta tailerra, datorren astean
Fanderiako Errota barrutik ezagutzeko bisitak eta hegaztiei buruzko erakusketa eskainiko ditu Ibaiaren Interpretazio Zentroak.
Burdinolaberri udal jatetxean ikusi ahalko da erakusketa. 
Ohikoa den moduan, Fanderiako Errotak berriro irekiko ditu ateak abuztuko bigarren asteburuan. Egun horretarako eskaintza prestatu du Ibaiaren Interpretazio Zentroak (Ibaiaren Etxea).
Asteburu honetan errota bisitatu eta horren funtzionamendua ezagutzeko bisita gidatuak egingo dituzte, eta datorren asteko larunbatean, hilak 19, hegaztiei buruzko erakusketa izango da ikusgai Burdinolaberri udal jatetxean. Irakurri, jarraian, xehetasunak:
- Hilak 12-13
- 10:30etik 14:00etara bitartean errota bisitatu, funtzionamendua ikusi eta haren historiari eta inguruko naturari buruzko erakusketa iraunkorra doan ikusi ahal izango dute bisitariek.
- Hilak 19
- Argazkigintzaren nazioarteko eguna aitzaki, Burdinolaberri udal jatetxeak errotarekin partekatzen duen aretoan hegaztiei buruz eskainiko den erakusketa ezagutu ahal izango da. Gainera, hegaztien elikadurari, habitatari eta lumajeari buruzko bitxikeria batzuk modu praktikoan ezagutzeko tailerrean ere parte hartu ahal izango dute bisitariek.
- Jarduera hori 11:00etatik 13:00etara bitarte egingo da, eta adin guztietako bisitariei zuzenduta dago. Parte hartzeko beharrezkoa da aldez aurretik izena ematea. Horretarako, deitu telefonoz Oarsoaldeko Turismo Bulegora (943 49 45 21) edo errotara (690 72 02 64).
