Tirri-Tarraren omenezko plaza berria, asteazkenetik aurrera zabalik
Sanpedrotarrak plaza estaliaz gozatzen hasi ahalko dira udan. Proisa eraikina zegoen orubearekin omenaldia egin diote fanfarreari.
483 metro koadroko azalera du plaza berriak. 
Hilaren 16an, asteazkena, zabalduko dute San Pedroko plaza estali berria. Proisa eraikina zegoen orubea Tirri-Tarra izeneko plaza da orain, eta berehala hasi ahalko dira sanpedrotarrak horretaz gozatzen.
Frontoi atzeko eremua estali ez ezik, horren hormak saneatu eta zuritu ditu udalak, eta mural berriak egiteko prest gelditu dira horiek. “Hemendik gutxira”, frontisaren atzealdeko pareta zuri horietan Nexgraffek Tirri-Tarraren omenezko mural handi bat egitea da asmoa.
Eremu horretan Proisa eraikina zegoen lehen, eta herriko fanfarreak erabili zuen urteetan. Orain berriro bizitzaz beteko da espazioa, beste izaera batekin: sanpedrotarrek eguraldi txarretik babesteko leku bat izango dute. Aspaldiko behar eta eskaera.
Xehetasunak
Espazioak forma angeluzuzena du, eta denera 483 metro koadroko azalera. Egin diren lanen ondorioz, euri-uren instalazioa eta argiztapena egokitu dira. Polikarbonato modularreko kristalez estalia dute gunea, eta egurrezko egitura batek eusten dio horri. Xehetasun gehiago eman ditu Kultura eta Hezkuntza zinegotzi Miguel Mari Torreak: “Jolasgunea altuagoa da, eta harmailetakoa, berriz, bilduagoa, eserlekuak erosoagoak izan daitezen jendaurreko ikuskizunetarako edo haurren atsedenerako”.
Goiko estalkia bi piezaz osatuta dago, eta iparraldeko argia sartzea errazten du horrek. Hegoaldeko aldeak babes handiagoa du eguzkiaren aurrean, zur laminatuzko pieza gehiago tartekatzen baitira. Hiru estalkien fisionomiak euri urak hustea errazten du eta, beraz, mantentze lanetarako erraztasunak izango direla ziurtatu dute adituek.
Bisita egin dute udal gobernukideek gaur.
